इंदापूर - बारामतीत बसवलेला दीड दिवसाचा गणपती दारू प्यायला म्हणून शरद पवारांनी त्याचे विर्सजन केले असं वादग्रस्त विधान राष्ट्रवादी काँग्रेस शरद पवार गटाचे नेते उत्तम जानकर यांनी केले. इंदापूरातहर्षवर्धन पाटील यांच्या पक्षप्रवेश कार्यक्रमात ते बोलत होते. उत्तम जानकर यांनी या भाषणातून अप्रत्यक्षपणे अजित पवार आणि इंदापूरचे विद्यमान आमदार दत्तात्रय भरणे यांच्यावर निशाणा साधला. मात्र जानकरांचं वादग्रस्त विधान सोशल मीडियात व्हायरल होत असून यावर संतप्त प्रतिक्रिया उमटत आहेत. भाजपानेही उत्तम जानकर यांच्या विधानाचा आक्रमक समाचार घेतला आहे.
उत्तम जानकर म्हणाले की, अख्खा महाराष्ट्र ज्यांना सलाम घालतो, त्यांना घरातूनच आव्हान निर्माण केले गेले. सगळ्या महाराष्ट्रात याचे पडसाद उमटले. बारामतीतील गोरगरिब, शेतकरी, सामान्य महिला मजूर अशा सगळ्या भटक्या विमुक्तांसहित या लोकांची ही राजधानी..ही राजधानीच पडते की काय याची शंका तुम्हा आम्हा सगळ्यांना पडली होती. साहेबांनी बारामतीत दीड दिवसाचा गणपती बसवला होता. या गणपतीची लोकप्रियता एवढी वाढली होती की हा गणपती दूध प्यायचा म्हणून महाराष्ट्रभर बोलबाला झाला होता, मग एक दिवस बातमी आली हा गणपती दारू प्यायला, भ्रष्ट झाला म्हणून साहेबांनी दीड दिवसातच या गणपतीचं विसर्जन केले असं सांगत जानकरांनी अजितदादांवर टीका केली.
तसेच गणपतीचं विसर्जन केल्यानंतर गणपतीच्या पायाजवळ हा उंदिरमामा राहिला होता. हा सगळ्या तालुक्याला मामा बनवणारा उंदिरमामा...इंदापूर तालुक्याचा मार्ग साहेब कसा काढणार यासाठी मी काळजीत होतो. मला वाटत होता एखादा खटका लावून, एखादा पिंजरा लावून या उंदिरमामाचा बंदोबस्त करतील पण साहेबांनी बुलडोझरच फिरवला अशा शब्दात उत्तम जानकरांनी दत्ता भरणे यांना टोला लगावला.
उत्तम जानकरला चौकाचौकात ठोकू - भाजपा
दरम्यान, उत्तम जानकरला जी भाषा कळते, त्याच भाषेत त्यांना उत्तर दिले पाहिजे. उत्तम जानकरला उलटा टांगून महाराष्ट्रात मारलं पाहिजे. हिंदूंच्या भावना इतक्या स्वस्त नाहीत, सकाळी सकाळी नवटाक मारून शरद पवारांच्या सभेतून वाट्टेल ते बरळणारे उत्तम जानकर या महाराष्ट्रात हिंदुत्ववादी जनता तुला चौकाचौकात बडवेल. ज्या धर्मात जन्माला आलाय, जो देव आपले आई वडील मानत होते, त्याची जाण तुम्ही ठेवली पाहिजे. व्होट जिहादमुळे मिळणाऱ्या आयत्या मतामुळे तुम्ही सोकावला. उत्तम जानकर तुला चौकाचौकात ठोकू. अट्टल दारूड्या आणि वाया गेलेल्या पुढाऱ्याच्या अतिशय घाणेरड्या विधानाचा मी तीव्र शब्दात निषेध करतो असं सांगत भाजपा प्रवक्ते अजित चव्हाण यांनी जानकरांच्या विधानाचा समाचार घेतला.