शिरोळमध्ये पुन्हा ‘गोकुळ’ नांदणार?

उमेदवारीची चर्चा : विद्यमान अध्यक्ष दिलीप पाटील यांना कडवा विरोध शक्य

संदीप बावचे-जयसिंगपूर -गोकुळ दूध संघाच्या निवडणुकीचे पडघम वाजत असले तरी शिरोळ व हातकणंगले तालुक्यांत यावेळी उमेदवारी कोण मिळविणार, याविषयी जोरदार चर्चा सुरू झाली आहे. निवडणुका काही महिन्यावर येऊन ठेपल्या आहेत. विद्यमान अध्यक्ष दिलीपराव पाटील हे इच्छुक आहेत. मात्र, स्थानिक गटबाजी व नुकत्याच झालेल्या विधानसभा निवडणुकीचा रंग वाढल्याने ‘गोकुळ’चे अध्यक्ष पाटील यांना कडवा विरोध होण्याची शक्यता आहे.
शिरोळ-हातकणंगले या दोन तालुक्यांचा एकच मतदारसंघ आहे. हातकणंगले तालुक्यात ७६, तर शिरोळ तालुक्यात १२३ दूध संस्था आहेत. शिरोळ तालुक्यात डॉ. राजेंद्र पाटील-यड्रावकर, डॉ. सा. रे. पाटील गटाची मोठी ताकद आहे, तर हातकणंगले तालुक्यात महाडिक, इंगवले, आवाडे गटांचे प्राबल्य आहे. उमेदवारीसाठी संस्थेचे ठराव गोळा करण्यासाठी इच्छुक उमेदवारांची धावपळ सुरू आहे.
गेली १५ वर्षे दिलीपराव पाटील यांनी गोकुळ दूध संघाचे प्रतिनिधित्व केले आहे. विशेष म्हणजे या संघाचे अध्यक्षपदही मिळविण्यात पाटील यांनी बाजी मारली आहे.
गोकुळ दूध संघाची निवडणूक जाहीर होताच पाटील यांना नेहमीच शिरोळ तालुक्यातून कडवा विरोध व्हायचा. पण, विरोधकांच्या डावपेचात पाटील कधीच सापडले नाहीत. नुकत्याच झालेल्या शिरोळ विधानसभा निवडणुकीत पाटील यांनी नातेसंबंधामुळे शिवधनुष्याला मदत केली. स्वकीय असणाऱ्या कॉँग्रेस पक्षातील काही कार्यकर्त्यांना त्यांनी दुखावले. त्यामुळे या निवडणुकीत त्यांना कडवा विरोध पुन्हा होणार, अशी परिस्थिती निर्माण झाली आहे. याचे उट्टे काढण्यासाठी हातकणंगले तालुक्यातून गोकुळ दूध संघाचा प्रतिनिधी द्यायचा, अशी नवी खेळी होण्याची शक्यता आहे.
दरगोबा दूध संस्थेचे अध्यक्ष आप्पासाहेब गावडे यांनी प्रत्येक निवडणुकीत प्रतिनिधित्व मिळावे म्हणून दावा केला होता; पण त्यांना हुलकावणीच मिळाली. यंदा बदलत्या राजकीय समीकरणामुळे गावडे यांना काही राजकीय नेत्यांचे पाठबळ मिळण्याची शक्यता आहे. माजी आमदार डॉ. सा. रे. पाटील यांचे गावडे हे खंदे कार्यकर्ते आहेत.

‘महादेवा’ची कृपा कुणावर ?
शिरोळ, हातकणंगले तालुक्यांत आमदार महादेवराव महाडिक यांना मानणारा गट आहे. या तालुक्यात महाडिक गटाने राजकीय वजन निर्माण केले आहे. गत गोकुळ निवडणुकीत अमल महाडिक यांची संधी हुकली आहे. त्यामुळे महाडिक या निवडणुकीत ‘गोकुळ’ची उमेदवारी देताना सच्चा कार्यकर्त्यांना की, नातेसंबंधाला वारसदार ठरवितात. ‘महादेवा’ची कृपा कोणावर राहणार, यावरच उमेदवारी निश्चित होणार आहे.