काळ्या बाजारात जाणारे रेशनचे २२ क्विंटल धान्य पकडले

हिंगोली तालुक्यातील नर्सी नामदेव परिसरातून एका पिकअप वाहनातून रेशनचे धान्य काळ्या बाजारात नेले जात असल्याची माहिती स्थानिक गुन्हे शाखेच्या पथकाला मिळाली होती. त्यावरून ४ जुलै रोजी दुपारी १ वाजेच्या सुमारास स्थानिक गुन्हे शाखेचे पोलीस निरीक्षक उदय खंडेराय यांच्या मार्गदर्शनाखाली पोलीस उप निरीक्षक किशोर पोटे, सपोउपनि बालाजी बोके, शंकर ठोंबरे, राजू ठाकूर, किशोर सावंत, आकाश टापरे, ज्ञानेश्वर पायघन यांच्या पथकाने लिंबाळा नर्सी ना. ते कडती रोडवरील कयाधू नदीच्या समोरील सिमेंटच्या पुलाजवळ एका पिकअप वाहनाची तपासणी केली. यावेळी वाहनात गहू व तांदूळ आढळून आला. हे धान्य रेशनचे असल्याची खात्री झाल्यानंतर वाहन नर्सी नामदेव पोलीस ठाण्यात लावण्यात आले. यात तपासणी केली असता यात २५ हजार १६० किमतीचे १२ क्चिंटल ५८ किलो वजनाचे गव्हाचे २४ पोते तसेच २० हजार ६०० रुपये किमतीचे १० क्विंटल ३० किलो वजनाचे तांदळाच्या २० पाेत्यासह ३ लाख ४५ हजार ७६० रुपयांचा मुद्देमाल जप्त केला. याप्रकरणी नर्सी नामदेव पोलीस ठाण्यात पोना राजूसिंग ठाकूर यांच्या फिर्यादीवरून चालक अनिल मच्छिंद्र कढणे (रा. मोहजा, ता. रिसोड),राम कळसाईकर (रा. नर्सी ना.), सलीम (पूर्ण ना. माहित नाही) यांच्या विरुद्ध गुन्हा नोंद झाला आहे. तपास पोलीस निरीक्षक उदय खंडेराय करीत आहेत. तपासात रेशनचे धान्य कुठून आणले, कोठे नेले जाणार होते याची माहिती समोर येणार आहे.