इन्स्टाग्राम स्टोरीमध्ये चूक झाल्यास आता डिलीट करायची झंझट मिटली; कंपनीने आणले भन्नाट 'Edit' फीचर!

इन्स्टाग्राम स्टोरी पोस्ट केल्यानंतर ती डिलीट न करता थेट एडिट करता येणार आहे. कंपनीने हे भन्नाट फीचर रोल आउट करण्यास सुरुवात केली आहे.

जर तुम्ही सोशल मीडिया प्लॅटफॉर्म इन्स्टाग्राम वापरत असाल, तर तुमच्यासाठी एक अत्यंत कामाची आणि आनंदाची बातमी आहे. अनेकदा घाईघाईत इंस्टाग्रामवर स्टोरी पोस्ट करताना स्पेलिंग मिस्टेक होते किंवा चुकीचा टॅग किंवा लिंक जोडली जाते. अशा वेळी ती चूक सुधारण्यासाठी पूर्ण स्टोरी डिलीट करून पुन्हा पोस्ट करावी लागायची. मात्र, आता हा मनस्ताप कायमचा थांबणार आहे. कारण, इंस्टाग्रामने आता युजर्ससाठी थेट स्टोरी एडिट करण्याचा पर्याय आणला आहे.

सोशल मीडियावरील काही युजर्सनी याचे स्क्रीनशॉट्स शेअर करत या नव्या अपडेटची माहिती दिली आहे. सध्या हे फीचर काही निवडक युजर्ससाठी रोल आउट करण्यात येत असून, लवकरच ते सर्वसामान्यांसाठी उपलब्ध होणार आहे.

कसे काम करणार हे एडिट फीचर?

व्हायरल झालेल्या स्क्रीनशॉट्सनुसार, स्टोरी पोस्ट केल्यानंतर युजर्सला त्या स्टोरीवर टॅप करावे लागेल. त्यानंतर एक नवा मेनू ओपन होईल, ज्यामध्ये 'Edit'चा पर्याय दिसेल. जेव्हा तुम्ही 'एडिट'वर क्लिक कराल, तेव्हा स्क्रीनवर एक वॉर्निंग पॉप-अप दिसेल. या वॉर्निंगमध्ये स्पष्ट लिहिले असेल की, एकदा तुम्ही एडिटिंग सुरू केल्यास स्टोरीचे मूळ व्हर्जन डिलीट होईल. तसेच, त्या स्टोरीवर आलेले लाईक्स, रिॲक्शन्स आणि कमेंट्स देखील रिसेट होतील. या फीचरमध्ये नेमके काय काय एडिट करता येईल याबाबतची सविस्तर माहिती अद्याप समोर आलेली नाही.

अँड्रॉईड युजर्सना थोडी वाट पाहावी लागणार!

इन्स्टाग्रामने हे जबरदस्त फीचर सध्या केवळ आयफोन वापरणाऱ्या मर्यादित युजर्ससाठीच रोल आउट करण्यास सुरुवात केली आहे. त्यामुळे अँड्रॉईड युजर्सना या फीचरचा लाभ घेण्यासाठी आणखी काही दिवस वाट पाहावी लागू शकते. इंस्टाग्रामच्या मूळ कंपनीने अधिकृतपणे यावर अजून शिक्कामोर्तब केले नसले, तरी चाचणी यशस्वी झाल्यानंतर हे फीचर सर्वांसाठी उपलब्ध होईल, अशी दाट शक्यता आहे.

इन्स्टाग्रामचा दणका; एकापाठोपाठ एक मोठे बदल

गेल्या काही दिवसांत इंस्टाग्रामने युजर्सचा अनुभव बदलण्यासाठी अनेक नवनवीन फीचर्स आणले आहेत. नुकतेच कंपनीने कमेंट केल्यानंतर १५ मिनिटांच्या आत ती एडिट करण्याचा पर्याय दिला होता. त्याशिवाय 'क्लोज फ्रेंड्स'साठी गायब होणारे फोटो पाठवण्याचे फीचरही आणले होते.

DM मधून एनक्रिप्शन हटल्याने प्रायव्हसी धोक्यात?

याच महिन्यात इन्स्टाग्रामने त्यांच्या डायरेक्ट मेसेजमधून एंड-टू-एंड एनक्रिप्शन हटवले आहे. यामुळे अनेक युजर्स नाराज आहेत, कारण यामुळे चॅटची प्रायव्हसी संपली असून, गरज पडल्यास कंपनी देखील तुमचे मेसेज पाहू शकते.