फलटण : प्रधानमंत्री आवास योजनेंतर्गत नोव्हेंबर २०२० ते फेब्रुवारी २०२१ या कालावधीत राबविलेल्या आवास अभियानांतर्गत प्रधानमंत्री व रमाई आवास योजनेंतर्गत अपूर्ण २५७ घरकुलांपैकी १५५ घरकुले पूर्ण झाली आहेत. उर्वरित घरकुले पूर्ण करावेत, अशा सूचना आमदार दीपक चव्हाण यांनी केल्या.
फलटण पंचायत समितीच्या अधिनस्त विभागाकडील विकासकामे/योजनांच्या आढावा बैठकीत अध्यक्षतेखाली ते बोलत होते. बैठकीस जिल्हा परिषदेचे माजी अध्यक्ष संजीवराजे नाईक-निंबाळकर, माणिकराव सोनवलकर, पंचायत समिती सभापती शिवरुपराजे खर्डेकर, उपसभापती रेखाताई खरात, जिल्हा परिषद सदस्य धैर्यशील अनपट, पंचायत समिती सदस्य बाळासाहेब ठोंबरे, सचिन रणवरे, संजय कापसे, संजय सोडमिसे, प्रतिभाताई धुमाळ, उपमुख्य कार्यकारी अधिकारी मनोज जाधव, गटविकास अधिकारी डॉ. अमिता गावडे पवार, सहायक गटविकास अधिकारी विनायक गुळवे उपस्थित होते.
बांधकाम विभागाकडील जनसुविधा, स्थानिक विकास, अंगणवाडी व अन्य सर्व योजनेतील २०१९-२०२० मधील मंजूर कामे ३१ मार्चपूर्वी पूर्ण करावीत. जी पूर्ण होणार नाहीत त्यांचे रद्द प्रस्ताव सादर करण्याच्या सूचना यावेळी संजीवराजे नाईक-निंबाळकर यांनी दिल्या.
राज्यस्तरीय आदर्श शाळा प्रकल्पासाठी तरडगाव व माझेरी (पुनर्वसन) या दोन शाळांची निवड झाली आहे. त्याबाबत शाळा व्यवस्थापन समित्यांची बैठक घेऊन शैक्षणिक जनजागृती करणेबाबत आमदार दीपक चव्हाण यांनी संबंधित अधिकाऱ्यांना सूचना दिल्या.
१८ फेब्रुवारी रोजी माझेरी २, हिंगणगाव २, शेरेचीवाडी (हिं) २, मुंजवडी १, आसू १, खटकेवस्ती १, सांगवी १ या गावांत दहा प्राथमिक शाळा खोल्या बांधकामास प्रशासकीय मान्यता मिळाल्या आहेत. तालुक्यातील ज्या ३७ प्रा. शाळांमध्ये शौचालये नाहीत त्याबाबतचे प्रस्ताव तातडीने दाखल करण्याच्या सूचना गटविकास अधिकारी डॉ. अमिता गावडे पवार यांनी संबंधितांना दिल्या.
फलटण तालुक्यात आजअखेर १० हजार २६० कोरोनाबाधित रुग्ण आढळून आले आहेत. सध्या १५० रुग्णांवर उपचार सुरू असल्याचे तालुका वैद्यकीय अधिकारी डॉ. पोटे यांनी निदर्शनास आणून दिले.
सर्व विभागांकडील सुरू नसलेली कामे तत्काळ सुरू करावीत. ३१ मार्चअखेर सुरू असलेली तसेच नसलेली सर्व कामे वेळेत पूर्ण करून प्राप्त अनुदान खर्च करावे, निधी अखर्चित राहणार नाही याची दक्षता घेण्याच्या सूचना उप मुख्य कार्यकारी अधिकारी मनोज जाधव यांनी केल्या.
गटविकास अधिकारी डॉ. अमिता गावडे पवार यांनी प्रास्तविक केले. आले. सहायक गटविकास अधिकारी विनायक गुळवे यांनी आभार मानले.
चौकट
पंचायत समितीत घराची प्रतिकृती
पंचायत समिती कार्यालय आवारात घरकुल योजनेतील घराची प्रतिकृती उभारण्यात येणार असून त्या जागेचे भूमिपूजन आमदार दीपक चव्हाण, संजीवराजे व मान्यवरांच्या हस्ते करण्यात आले.