‘समृद्ध जीवन’ची मालमत्ता कोतवडेतही

पुणे सीबीआयचा छापा : संगणक, कागदपत्रे जप्त?

रत्नागिरी : कोट्यवधी रुपयांच्या घोटाळ्याप्रकरणी वादात सापडलेल्या पुण्यातील समृद्ध जीवन फुडस् इंडिया लिमिटेड या कंपनीची जागा रत्नागिरी तालुक्यातील कोतवडे येथे असल्याचे निष्पन्न झाले आहे. कंपनीच्या या २७ एकर जागेत पसरलेल्या फार्महाऊसवर गुरुवारी पुणे केंद्रीय गुन्हा अन्वेषण (सीबीआय) पथकाने छापा टाकून काही कागदपत्रे व संगणक जप्त केला असल्याचे समजते.
२०१२ सालापासून ही कंपनी वादाच्या भोवऱ्यात सापडली आहे. या कंपनीने असंख्य छोट्या गुंतवणूकदारांकडून भरमसाट ठेवी गोळा केल्या होत्या. २०१३ साली ‘सेबी’ने (सिक्युरिटी अँड एक्स्चेंज बोर्ड) या संस्थेवर कारवाई केली. ‘सेबी’च्या मनाई असलेल्या वित्त कंपन्यांच्या यादीमध्ये समृद्ध जीवनचा समावेश करण्यात आला. या कंपनीचे अध्यक्ष महेश मोतेवार यांना डिसेंबर २०१५मध्ये अटक करण्यात आली. त्यानंतर एप्रिलमध्ये त्यांना पुन्हा अटक करण्यात आली.
असंख्य ठेवीदारांचे कोट्यवधी रुपये अडकले असल्याने या कंपनीच्या नावावर असलेल्या मालमत्तांवर टाच आणण्याची मागणी न्यायालयाकडे केली गेली होती. त्याला न्यायालयाने मान्यताही दिली. त्यानंतर कंपनीच्या मालमत्तांचा शोध सुरू करण्यात आला. यात रत्नागिरी तालुक्यातील कोतवडे येथे २७ एकर जागा कंपनीच्या नावावर असल्याची माहिती पुढे आली. तेथे एक फार्महाऊसही उभारण्यात आले आहे. या फार्महाऊसवर गुरुवारी पुण्याच्या केंद्रीय गुन्हा अन्वेषण शाखेच्या पथकाने छापा टाकला. या फार्महाऊसवर असलेल्या संगणकातील हार्डडिस्क आणि काही कागदपत्रे जप्त करण्यात आली असल्याचे समजते. (प्रतिनिधी)