Pune Police: अवैध धंदे चालकाकडून पैसे घेत असल्याचा व्हिडिओ व्हायरल; २ पोलीस कर्मचारी निलंबित

सार्वजनिक ठिकाणी आर्थिक देवाण-घेवाण करणे ही बाब पोलिस दलाच्या शिस्तीला व पोलिस दलाच्या लौकिकाला बाधा निर्माण करणारी आहे

पुणे : अवैध धंदेवाल्यांकडून पैसे घेतानाचा व्हिडिओ सोशल मीडियावर व्हायरल झाल्याने सहायक पोलिस फौजदारासह एका पोलिस हवालदाराला पोलिस उपायुक्त मिलिंद मोहिते यांनी निलंबित केले. सहायक पोलिस फौजदार बापुसाहेब किसनराव खुटवड आणि पोलिस हवालदार अमोल प्रकाश पवार अशी निलंबित करणार्यात आलेल्यांची नावे आहेत. हे दोघेही सहकारनगर पोलिस ठाण्याच्या तपास पथकात कार्यरत होते.

बापुसाहेब खुटवड आणि अमोल पवार हे अभिजित मारुती गायकवाड (वय ३६, रा. साईबाबा मंदिरासमोर, पर्वती दर्शन) या अवैध धंदे चालकाकडून पैसे घेत असल्याचा व्हिडिओ मार्च महिन्यात सोशल मीडियावर व्हायरल झाला होता. अशा प्रकारे अवैध धंदेचालवणाऱ्याच्या प्रत्यक्ष संपर्कात राहून त्यांच्यासोबत सार्वजनिक ठिकाणी आर्थिक देवाण-घेवाण करणे ही बाब पोलिस दलाच्या शिस्तीला व पोलिस दलाच्या लौकिकाला बाधा निर्माण करणारी आहे. अशा प्रकारच्या व्हिडिओ सोशल मीडियावर मोठ्या प्रमाणात व्हायरल झाल्याने जनमानसात पोलिस दलाची प्रतिमा मलीन झाली आहे, त्यामुळे खुटवड आणि पवार यांना पोलिस उपायुक्त मिलिंद मोहिते यांनी निलंबित केले.