Raghav Chadha : राघव चड्ढांनी २१ दिवसांपूर्वीच दिले होते 'आप'मधील फुटीचे संकेत; भाकीत ठरलं खरं

खासदार राघव चड्ढा यांनी २१ दिवसांपूर्वी पक्षात येणाऱ्या या फुटीचे संकेत दिले होते, याची कुणकुण कोणालाच लागली नाही.

शुक्रवारी आम आदमी पार्टीला मोठा झटका बसला आहे. पक्षात मोठी फूट पडली आहे. या फुटीचे संकेत राघव चड्ढा यांनी २१ दिवस आधीच दिले होते, पण त्याकडे एकतर दुर्लक्ष केले. उपनेतेपदावरून हटवल्यानंतर आणि राज्यसभेत बोलण्यास बंदी घातल्यानंतर दुसऱ्याच दिवशी राघव चड्ढा यांनी योग्य वेळी पक्षावर संकट येण्याचा इशारा दिला होता.

Raghav Chadha: राघव चड्ढा, हरभजनसिंग भाजपात! आम आदमी पार्टीत उभी फूट, राज्यसभेच्या १० पैकी ७ खासदारांचा पक्षाला 'राम-राम'

आम आदमी पार्टी आणि राघव चड्ढा यांच्यात मागील अनेक दिवसांपासून मतभेद होते, पण ते कधीही उघड झाले नव्हते.  कथित मद्य घोटाळ्यात अरविंद केजरीवाल यांच्या अटकेपासून ते त्यांना सत्र न्यायालयाकडून मिळालेल्या दिलासापर्यंतच्या विविध मुद्द्यांवर राघव चड्ढा यांचे मौन पक्षाला अस्वस्थ करत होते. अनेक महिने हे सहन केल्यानंतर, २ एप्रिल रोजी 'आप'ने अचानक राघव चड्ढा यांना राज्यसभेतील उपनेतेपदावरून हटवले आणि अध्यक्षांकडे अशीही मागणी केली की, त्यांना 'आप'च्या वतीने बोलण्यासाठी वेळ देऊ नये. 

राघव चड्ढा यांनी ३ एप्रिल रोजी संकट येण्याबाबत भाष्य केले होते

संसद भवनाबाहेर उभे राहून, राघव चड्ढा यांनी पक्षाच्या या कृतीबद्दल चिंता व्यक्त केली होती. आपण सामान्य लोकांचा आवाज उठवण्याचा कसा प्रयत्न करत होतो आणि पक्षाने आपला आवाज कसा दाबला, हे स्पष्ट करताना त्यांनी स्वतःच्या चुकीवरच प्रश्नचिन्ह उपस्थित केले. यावेळी त्यांनी पक्षाला संकेत दिले होते. माझा आवाज दाबला, त्यांना मला काहीतरी सांगायचे आहे, माझ्या मौनाला पराभव समजू नका... मी ती नदी आहे, जी वेळ आल्यावर पूर धारण करते, असे सांगत त्यांनी संकेत दिले होते.