दहावी-बारावी पुरवणी परीक्षेचे वेळापत्रक जाहीर; निकालही लवकर लागणार

दहावीची पुरवणी परीक्षा दि. १६ ते ३० जून दरम्यान, तर बारावीची परीक्षा दि. १६ जून ते ८ जुलै दरम्यान घेण्यात येणार आहे

पुणे : महाराष्ट्र राज्य माध्यमिक व उच्च माध्यमिक मंडळाने यंदा दहावी-बारावीच्या नियमित परीक्षा दरवर्षीच्या तुलनेत लवकर घेतल्या. निकानही लवकर लावला. आता पुरवणी परीक्षा देखील लवकर घेतली जात आहे. याबाबतचे वेळापत्रकही जाहीर झाले असून, इयत्ता दहावीची पुरवणी परीक्षा दि. १६ ते ३० जून दरम्यान, तर बारावीची परीक्षा दि. १६ जून ते ८ जुलै दरम्यान घेण्यात येणार आहे. विशेष म्हणजे याचा निकाल देखील १५ जुलै पर्यंत लावले जातील, अशी माहिती राज्य मंडळाच्या वतीने देण्यात आली.

दरम्यान, नुकताच जाहीर झालेला दहावीचा निकाल काही विद्यार्थ्यांना पाहता आला नाही, याबाबत विचारणा केली असता काही तांत्रिक कारणे आली होती, त्यात सुधारणा केली आहे. त्यामुळे सर्वांचे निकाल दिसत आहेत. त्यातही काही अडचणी असल्यास दूर केली जाईल, अशी ग्वाही देखील राज्य मंडळाचे अध्यक्ष डाॅ. त्रिगुण कुलकर्णी यांनी दिले आहे.