Pune Crime: पुणे महापालिकेच्या सुरक्षा रक्षकाचा गळा चिरून खून; नदीपात्रात मोकळ्या जागेत आढळून आला मृतदेह

मध्यवर्ती भागात झालेल्या घटनेमुळे मोठी खळबळ उडाली असून नागरिकांमध्ये भीतीचे वातावरण निर्माण झाले आहे

पुणे : महापालिकेतील कंत्राटी सुरक्षा रक्षकाचा गळा चिरून खून करण्यात आल्याची घटना रविवारी (दि.१९) सकाळी साडेसात वाजण्याच्या सुमारास उघडकीस आली. कृषल कसबे (वय ४२, रा. गंज पेठ) असे मृत सुरक्षा रक्षकाचे नाव आहे. कृषल यांचा मृतदेह डेक्कन परिसरातील नदीपात्रातील मोकळ्या जागेत आढळून आला. त्यांच्या गळ्यावर तीक्ष्ण हत्याराने वार केल्याचे दिसून आले. या प्रकरणी पोलिस अंमलदार आकाश बाळासाहेब सोनवणे (वय ३२, रा. शिवाजीनगर पोलिस वसाहत) यांनी डेक्कन पोलिस ठाण्यात फिर्याद दिली आहे. 

दरम्यान, पोलिसांना या प्रकरणी दोघांवर संशय असून, पोलिस त्यांचा शोध घेत असल्याची माहिती पोलिस उपायुक्त कृषिकेश रावले यांनी दिली. या प्रकरणाचा पुढील तपास डेक्कन पोलिस ठाण्याच्या वरिष्ठ पोलिस निरीक्षक गिरीषा निंबाळकर करीत आहेत. दरम्यान, या घटनेमुळे डेक्कन परिसरात मोठी खळबळ उडाली असून नागरिकांमध्ये भीतीचे वातावरण निर्माण झाले आहे. घटनास्थळी पोलिसांनी पंचनामा करून मृतदेह शवविच्छेदनासाठी रुग्णालयात पाठवला आहे. प्राथमिक तपासात जुन्या वैमनस्यातून किंवा वैयक्तिक कारणातून हा खून झाल्याची शक्यता व्यक्त करण्यात येत असून, परिसरातील सीसीटीव्ही फुटेज तपासले जात आहेत. तसेच, संशयितांच्या हालचालींचा मागोवा घेण्यासाठी विशेष पथके तयार करण्यात आली असून, लवकरच आरोपींना अटक करण्यात येईल, असा विश्वास पोलिसांनी व्यक्त केला आहे.