पुणे : देशभरात गाजत असलेल्या नीट पेपरफुटी प्रकरणाचे धागेदोरे आता पुण्यापर्यंत पोहोचले असून, या घोटाळ्यातील ‘पुणे कनेक्शन’ समोर आले आहे. सीबीआयने अहिल्यानगर जिल्ह्यातील राहुरी येथून मुख्य संशयित धनंजय लोखंडे याला ताब्यात घेतले. त्यानंतर, लोखंडेच्या संपर्कात असलेल्या बिबवेवाडीतील मनीषा वाघमारे आणि अभियांत्रिकीचे शिक्षण घेणाऱ्या एकाला पुणे पोलिसांनी ताब्यात घेत चौकशी केली. विद्यार्थी शोधणे, त्यांच्याकडून पैसे गोळा करणे आणि संशयितांपर्यंत पोहोचवणे, अशी भूमिका या दोघांची असल्याचा संशय तपास यंत्रणांना आहे.
सुखसागरनगर परिसरातून मनीषा वाघमारे (वय ४६) हिला ताब्यात घेतले असून, मांजरीतून वाघोली परिसरातील अभियांत्रिकी महाविद्यालयात द्वितीय वर्षाचे शिक्षण घेणाऱ्या शेषराव सोलंकी याला गुन्हे शाखेने चौकशीसाठी ताब्यात घेतले आहे. पुणे पोलिसांच्या गुन्हे शाखेकडून ही कारवाई करण्यात आली. मंगळवारपासून पुणे पोलिस चार जणांचा शोध घेत होते. त्यामध्ये धनंजय लोखंडे आणि ओंकार शिंगोटे यांचाही समावेश होता. धनंजय लोखंडे याचे लोकेशन वाघोली परिसरात मिळाल्यानंतर पोलिसांनी सापळा रचला होता. मात्र, पोलिस पोहोचण्यापूर्वीच तो फरार झाला. दरम्यान, अहमदनगर जिल्ह्यातील राहुरी परिसरातून केंद्रीय अन्वेषण विभागाने (सीबीआय) धनंजय आणि ओंकार या दोघांना ताब्यात घेतले.
तांत्रिक तपासाच्या दरम्यान मनीषा वाघमारे आणि शेषराव सोलंकी हे दोघेही धनंजय लोखंडेच्या सतत संपर्कात असल्याची माहिती पुणे पोलिसांना मिळाली होती. त्यानुसार, सकाळी सुमारे आठच्या सुमारास सुखसागर नगर येथून मनीषा वाघमारे हिला ताब्यात घेण्यात आले. प्राथमिक चौकशीनंतर दुपारी तिला सीबीआयच्या ताब्यात देण्यात आले. दुसरीकडे शेषराव सोलंकी याचीही पोलिसांकडून कसून चौकशी सुरू आहे.
मनीषा वाघमारे हिचे बिबवेवाडीत ब्युटी पार्लर असून, तिचा पती डेंटिस्ट आहे. पोलिस तपासात सुमारे तीन वर्षांपूर्वी इंस्टाग्रामच्या माध्यमातून धनंजय लोखंडे आणि मनीषा वाघमारे यांची ओळख झाली होती. मुलीला मेडिकलमध्ये प्रवेश मिळवून देण्याचे आमिष दाखवत लोखंडे तिच्या संपर्कात आला होता. विद्यार्थ्यांना मेडिकल प्रवेश मिळवून देण्याच्या नावाखाली ग्राहक शोधून दिल्यास चांगले कमिशन देण्याचे आमिष लोखंडेने तिला दाखविले होते. पार्लरमध्ये येणाऱ्या ग्राहकांशी संवाद साधताना ती मेडिकल प्रवेशाविषयी चर्चा करत असल्याचे तपासात समोर आले आहे. नीट परीक्षेपूर्वी काही दिवसांमध्ये मनीषा वाघमारेच्या बँक खात्यात सुमारे दहा लाख रुपये जमा झाल्याचे पोलिस तपासात निष्पन्न झाले आहे. हे पैसे नीट परीक्षा आणि मेडिकल प्रवेशाच्या नावाखाली घेतल्याचा संशय व्यक्त केला जात आहे, याची चौकशी सुरू आहे. पुण्यात या संपूर्ण रॅकेटसाठी स्वतंत्र नेटवर्क सक्रिय होते. पोलिसांनी मनीषा वाघमारेचा मोबाइल जप्त केला असून, अनेक व्हॉट्सअप चॅट डिलीट केल्याचे आढळून आले आहे. मात्र, ‘१० लाख रुपये आले आहेत’ असा उल्लेख असलेला एक चॅट पोलिसांच्या हाती लागला आहे. त्यामुळे संशय गडद झाला आहे.
चौघांचा गट शहरात होता कार्यरत?
धनंजय लोखंडे, ओंकार शिंगोटे, मनिषा वाघमारे आणि शेषराव सोलंकी या चौघांचा गट पुण्यात अशा प्रकरणांसाठी कार्यरत असल्याची माहिती पुणे पोलिसांकडे होती. धनंजय आणि ओंकार यांची शहरात नेहमी ये-जा असायची. यामुळे किती लोकांकडून यांनी पैसे घेतले आहेत, याचा तपास पुणे पोलिस करत आहेत.
नीट पेपर लीक प्रकरणात संशयाच्या आधारे महिला आणि एका युवकाला ताब्यात घेण्यात आले आहे. महिलेला प्राथमिक चौकशीनंतर सीबीआयच्या ताब्यात देण्यात आले असून, युवकाची सविस्तर चौकशी सुरू आहे. - अमितेश कुमार, पोलिस आयुक्त, पुणे.
Web Summary : Pune police uncovered a NEET paper leak connection, detaining a woman and student. They are suspected of collecting money from students. Investigation revealed ₹10 lakh deposited in woman's account. A four-member group was active in Pune.
Web Summary : पुणे पुलिस ने नीट पेपर लीक मामले में एक महिला और छात्र को हिरासत में लिया। उन पर छात्रों से पैसे लेने का संदेह है। जांच में महिला के खाते में ₹10 लाख जमा पाए गए। पुणे में चार लोगों का समूह सक्रिय था।