मंदिराने ठेवलेली एफडी बँकांना हडपायची होती, सर्वोच्च न्यायालय म्हणाले, ती देवाची संपत्ती...

आर्थिक संकटातील बँकांनी थिरुनेल्ली मंदिराचे मुदत ठेव परत देण्यास नकार दिल्यावर सर्वोच्च न्यायालयाने फटकारले; फक्त धार्मिक कार्यांसाठीच पैशाचा वापर करण्याचे स्पष्टीकरण.

 

नवी दिल्ली: मंदिरात जमा झालेला पैसा ही देवतेची मालमत्ता असते आणि आर्थिक संकटात असलेल्या सहकारी बँकांना वाचवण्यासाठी या पैशाचा वापर केला जाऊ शकत नाही, असा महत्त्वाचा आणि स्पष्ट निर्वाळा सर्वोच्च न्यायालयाने दिला आहे. केरळ उच्च न्यायालयाने थिरुनेल्ली मंदिर देवस्वोमचे मुदत ठेव त्वरित परत करण्याचे जे आदेश दिले होते, त्या आदेशाला आव्हान देणाऱ्या सहकारी बँकांच्या याचिका सर्वोच्च न्यायालयाने फेटाळून लावल्या.

मुख्य न्यायमूर्ती सूर्यकांत आणि न्यायमूर्ती जॉयमाल्या बागची यांच्या खंडपीठाने सुनावणीदरम्यान कठोर टिप्पणी केली. खंडपीठाने स्पष्ट केले की, जर एखादी बँक आर्थिकदृष्ट्या कमकुवत असेल, तर मंदिराचा निधी त्यांच्या मदतीसाठी वापरला जाऊ शकत नाही. मंदिराचा पैसा केवळ मंदिर आणि देवतेच्या हितासाठीच वापरला जाऊ शकतो, असे न्यायालयाने ठामपणे सांगितले.

यावेळी न्यायालयाने विचारले की, 'जेव्हा राष्ट्रीयीकृत बँकांमध्ये सुरक्षितपणे आणि अधिक व्याजदराने रक्कम ठेवता येते, तेव्हा आर्थिक अडचणीत असलेल्या सहकारी बँकेत मंदिराचा निधी का ठेवला जावा?' ग्राहकांना आकर्षित करता येत नसेल, तर ती बँकेची समस्या आहे; मंदिराचा पैसा त्यांच्यासाठी आधारवड ठरू शकत नाही, असेही निरीक्षण न्यायालयाने नोंदवले. थिरुनेल्ली देवस्वोमने वारंवार विनंती करूनही बँका एफडीची रक्कम परत करत नसल्याने हा वाद निर्माण झाला होता.