गुजरातच्या सूरत शहरातून एक अत्यंत धक्कादायक घटना समोर आली आहे. एका इमारतीला आग लागल्याने आणि सिलिंडरचा स्फोट झाल्याने दोन लोकांचा मृत्यू झाला आहे. या आगीत इमारतीत राहणारे ९ लोक जखमी झाले आहेत. आगीची माहिती मिळताच अग्निशमन दलाचे जवान घटनास्थळी दाखल झाले असून आग विझवण्याचे प्रयत्न सुरू आहेत. या दुर्घटनेतील जखमींना उपचारासाठी तातडीने रुग्णालयात दाखल करण्यात आलं.
सूरतच्या भरतनगर भागात ही घटना घडली आहे. गुरुवारी पहाटे ५ च्या सुमारास कापोद्रा येथील एका इमारतीच्या तिसऱ्या मजल्यावर भीषण आग लागली. ही आग पसरत किचनपर्यंत पोहोचली आणि तिथे ठेवलेल्या सिलिंडरचा मोठा स्फोट झाला. या दुर्घटनेत दोन जणांचा जागीच मृत्यू झाला, तर ९ जण गंभीररित्या भाजले आहेत.
या घटनेची माहिती देताना अग्निशमन दलाच्या अधिकाऱ्याने सांगितलं की, इमारतीमध्ये एकूण आठ गॅस सिलिंडर ठेवलेले होते. त्यापैकी दोन सिलिंडरचा स्फोट झाल्याने दोघांचा मृत्यू झाला. घटनेची माहिती मिळताच चार अग्निशमन केंद्रांतून गाड्या घटनास्थळी रवाना करण्यात आल्या. अग्निशमन दल पोहोचण्यापूर्वीच एका एलपीजी सिलिंडरचा स्फोट झाला होता, ज्यामुळे आग अधिकच भडकली. यामध्ये ९ जण जखमी झाले आहेत.
अग्निशमन दलाच्या जवानांनी तिसऱ्या मजल्यावरील पत्रे तोडून आत अडकलेल्या लोकांना बाहेर काढलं आणि रुग्णालयात पाठवलं. या संपूर्ण दुर्घटनेत इमारतीत अडकलेल्या एकूण ११ जणांना बाहेर काढण्यात यश आलं, ज्यापैकी ९ जण जखमी असून २ जणांचा मृत्यू झाला आहे.