स्वराज, जेटलींनंतर आता नरेंद्र मोदींचा नंबर; ब्रिटिश मुस्लिम खासदाराच्या वादग्रस्त ट्विटने खळबळ

प्रज्ञा सिंह यांच्या 'काळ्या जादू'च्या विधानावर टिप्पणी करताना त्यांचा तोल सुटला आहे.

ठळक मुद्देवर्षभराच्या काळात भाजपाचे पाच दिग्गज नेते आणि भली माणसं काळाच्या पडद्याआड गेली आहेत. अशा प्रसंगी एका ब्रिटीश खासदारानं पंतप्रधान नरेंद्र मोदी यांच्या संदर्भात एक वादग्रस्त ट्विट केलं आहे.  प्रज्ञा सिंह यांच्या 'काळ्या जादू'च्या विधानावर टिप्पणी करताना त्यांचा तोल सुटला आहे.

गेल्या दीड वर्षात भाजपाने आपले पाच तेजस्वी हिरे गमावले आहेत. माजी पंतप्रधान अटलबिहारी वाजपेयी, माजी केंद्रीय मंत्री अनंतकुमार, मनोहर पर्रिकर, सुषमा स्वराज आणि अरुण जेटली हे पाच दिग्गज नेते आणि भली माणसं काळाच्या पडद्याआड गेली आहेत. सुषमा स्वराज, बाबुलाल गौर आणि अरुण जेटली यांचं निधन तर अगदी काही दिवसांच्या अंतराने झालंय. त्यांच्या जाण्याने निर्माण झालेली पोकळी भरून निघणं खूप कठीण आहे. अशा प्रसंगी एका ब्रिटीश खासदारानं पंतप्रधान नरेंद्र मोदी यांच्या संदर्भात एक वादग्रस्त ट्विट केलं आहे. 

लॉर्ड नझीर अहमद हे ब्रिटीश संसदेचं वरिष्ठ सभागृह असलेल्या हाऊस ऑफ लॉर्डचे आजीव सदस्य म्हणून नियुक्त करण्यात आलेले पहिले मुस्लिमधर्मीय नेते आहेत. 'भाजपा नेत्यांचं एकापाठोपाठ एक निधन होत आहे आणि आता पुढचा नंबर नरेंद्र मोदींचा आहे', अशा आशयाच्या त्यांच्या ट्विटनं एकच खळबळ उडवून दिली आहे. भाजपा खासदार प्रज्ञा सिंह यांच्या 'काळ्या जादू'च्या विधानावर टिप्पणी करताना त्यांचा तोल सुटला आहे.

Claims of sorcery, Jadoo , magic, witchcraft, on @BJP4India by opposition Jaitley, Gaur former CM of Madhya Pradesh, Shushma Swaraj , Atal Vajpayee , Manohar Parrikar CM Goa and Arun Jaitley ... have all died in the last one year hey @narendramodi is next https://t.co/Kqfco5RXk9

— Lord Nazir Ahmed (@nazir_lord) August 26, 2019

'भाजपा नेत्यांवर विरोधी पक्षांनी जादूटोणा, तंत्र-मंत्र केल्याच्या दाव्यांदरम्यान गौर, सुषमा स्वराज, अटलबिहारी वाजपेयी, मनोहर पर्रिकर आणि अरुण जेटली यांचं गेल्या वर्षभरात निधन झालं. आता पुढे नरेंद्र मोदी', असं लॉर्ड नझीर अहमद यांनी म्हटलंय. त्यानंतर भारतातीलच नव्हे, तर जगभरातील नेटकऱ्यांनी अहमद यांच्यावर टीकेची झोड उठवली आहे. मोदी सरकारमधील मंत्री किरण रिजीजू यांनीही नझीर अहमद यांना चपराक लगावली आहे.

'अशा प्रकारच्या ब्रिटीश बुद्धिजीवी वर्गाकडे पाहिलं की, या भूमीवर कुठले-कुठले लोक आलेत, हेच मला समजत नाही. लोकांना मॅनेज करून तुम्ही हाऊस ऑफ लॉर्डचे सदस्य झाला आहात का?', असा सडेतोड सवाल किरण रिजीजू यांनी केला आहे.

I'm unable to come to terms with the fact as to how the hell on this planet, in the midst of the whole British intelligentsia, did you manage to get appointed as a Member of the House of Lords !!! https://t.co/GnolNL5ADD

— Kiren Rijiju (@KirenRijiju) August 26, 2019

दरम्यान, माजी केंद्रीय अर्थमंत्री अरुण जेटली यांचं २४ ऑगस्ट रोजी निधन झालं होतं. तत्पूर्वी, ६ ऑगस्टला सुषमा स्वराज यांचं आकस्मिक निधन देशवासीयांना चटका लावून गेलं होतं.