मालेगाव शहरात घटसर्प या गंभीर संसर्गजन्य आजारामुळे दोन सख्या भावांचा मृत्यू झाल्याची धक्कादायक घटना समोर आली. या घटनेनंतर आरोग्य प्रशासन पूर्णपणे अलर्ट मोडवर गेले असून नागरिकांना तातडीने लसीकरण करून घेण्याचे आवाहन करण्यात येत आहे. मात्र, काही भागांमध्ये मोठ्या प्रमाणात लसीकरणाला विरोध होत असल्याने आरोग्य प्रशासन चिंतेत आहे. आरोग्य विभागाने मालेगावातील नागरिकांना सतर्क राहण्याचे आणि ताप, घसा दुखणे, श्वास घेण्यास त्रास अशी लक्षणे दिसल्यास त्वरित रुग्णालयात जाण्याचे आवाहन केले आहे. दरम्यान, घटसर्प आजार नेमका काय आहे? त्याची लक्षणे काय आहेत? त्याबद्दल सविस्तर जाणून घेऊयात.
मृत मुलांची तब्येत बिघडल्यानंतर त्यांना नाशिक येथील शासकीय रुग्णालयात दाखल करण्यात आले. त्यावेळी दोन्ही मुलांमध्ये घटसर्प गंभीर आजाराची लक्षणे आढळून आली. त्यानुसार डॉक्टरांनी त्यांच्यावर उपचारही सुरू करण्यात आले. डॉक्टरांनी त्यांना वाचवण्यासाठी प्रयत्न केले, मात्र उपचारादरम्यान दोघांचाही मृत्यू झाला. या आजाराचे गांभीर्य लक्षात घेऊन आरोग्य प्रशासनाने नागरिकांना लसीकरण करण्याचे आवाहन केले. आरोग्य तज्ज्ञांच्या मते, घटसर्पापासून संरक्षण मिळवण्यासाठी बालपणात दिली जाणारी डीपीटी लस अत्यंत प्रभावी आणि सुरक्षित आहे. या लसीमध्ये डिफ्थेरिया, कुक्कुरखोकला आणि टिटॅनसपासून संरक्षण मिळते. मात्र, काही भागांत लसीकरणाबाबत गैरसमज आणि विरोध असल्याने आरोग्य प्रशासन चिंतेत आहे. त्यामुळे आरोग्य विभागाने नागरिकांना अफवांवर विश्वास न ठेवता मुलांचे वेळेवर लसीकरण करून घेण्याचे आवाहन केले आहे.
घटसर्प म्हणजे नेमका कोणता आजार?
घटसर्प हा प्रामुख्याने लहान मुलांमध्ये आढळणारा अत्यंत गंभीर आणि संसर्गजन्य जीवाणुजन्य आजार आहे. हा आजार कॉरीनेबॅक्टेरियम डिफ्थेरीयानावाच्या जिवाणूमुळे होतो. या जिवाणूमुळे घसा आणि नाकाच्या भागावर गंभीर परिणाम होतो. विशेष म्हणजे, हे जिवाणू शरीरात विषारी द्रव्य तयार करतात. हे विष रक्ताद्वारे शरीरातील महत्त्वाच्या अवयवांपर्यंत पोहोचते आणि हृदय, मूत्रपिंड तसेच मज्जासंस्थेवर गंभीर दुष्परिणाम करतात. वेळेवर उपचार न मिळाल्यास हा आजार जीवघेणा ठरू शकतो.
घटसर्प आजाराचा प्रसार कसा होतो?
घटसर्पाचा संसर्ग बाधित व्यक्तीच्या शिंकण्याने किंवा खोकल्याने हवेद्वारे पसरतो. तसेच, रुग्णाने वापरलेल्या वस्तूंचा वापर केल्यानेही संसर्ग होऊ शकतो. त्यामुळे आरोग्य विभागाने नागरिकांना स्वच्छता राखण्याचे आणि संशयित लक्षणे दिसताच त्वरित डॉक्टरांचा सल्ला घेण्याचे आवाहन केले आहे.
उपचार कसे केले जातात?
घटसर्पाची लागण झाल्याचा संशय आल्यास त्वरित वैद्यकीय उपचार घेणे अत्यावश्यक असते. या आजारावर प्रतिजैविके आणि डिफ्थेरिया अँटीटॉक्सिनच्या मदतीने उपचार केले जातात. वेळेवर उपचार मिळाल्यास रुग्णाचे प्राण वाचू शकतात. महत्त्वाचे म्हणजे, हा आजार जनावरांना देखील होतो. मात्र, जनावरातील घटसर्प वेगळा असतो.
Web Summary : Two children died in Malegaon due to diphtheria. Health officials are urging vaccination amidst resistance. Diphtheria, a bacterial infection, affects the throat and can be fatal. Early treatment with antitoxins and antibiotics is crucial. Awareness and vaccination are key to prevention.
Web Summary : मालेगाँव में डिप्थीरिया से दो बच्चों की मौत हो गई। स्वास्थ्य अधिकारी विरोध के बीच टीकाकरण के लिए आग्रह कर रहे हैं। डिप्थीरिया, एक जीवाणु संक्रमण, गले को प्रभावित करता है और घातक हो सकता है। एंटीटॉक्सिन और एंटीबायोटिक दवाओं के साथ शीघ्र उपचार महत्वपूर्ण है। जागरूकता और टीकाकरण रोकथाम के लिए महत्वपूर्ण हैं।