सवलतीच्या दरात कर्ज उपलब्ध करून देण्याचे आमिष

सवलतीच्या दरात कर्ज उपलब्ध करून देण्याचे आमिष

सिडको : जिल्हा उद्योग केंद्रामार्फत विविध व्यवसायांसाठी सवलतीच्या दरात कर्ज उपलब्ध करून देण्याचे आमिष दाखवून सिडको परिसरातील नागरिकांची लाखो रुपयांची फसवणूक केल्याचा प्रकार उघडकीस आला आहे़ कर्ज प्रकरणात फसवणूक झालेल्या काही महिलांनी अंबड पोलीस ठाण्यात लेखी तक्रारही केली आहे़ सिडकोतील शुभम पार्कच्या एका गाळ्यामध्ये विश्वधर्म अपंग मानवसेवा संघ (रजि) ट्रस्ट संचलित नाशिक जिल्हा अपंग, विधवा, निराधार, आदिवासी पुनर्वसन केंद्र व अपंग विकास महिला औद्योगिक सहकारी संस्था लिमिटेड, नाशिक या नावाने कार्यालय सुरू करण्यात आले आहे़ या कार्यालयात विशेषत: महिलांना बोलावून जिल्हा उद्योग केंद्रातून सवलतीच्या दरात कर्ज उपलब्ध करून देण्यात येईल, असे सांगितले जाते़ या कार्यालयात स्वत:ला एजंट म्हणून सांगणारे भारती कानडे, सीमा खंबलवार (रा़शुभमपार्क, सिडको) व प्रतिभा यादव (रा़सावतानगर,सिडको) या तिघींनी महिलांची तसेच इतर नागरिकांची फसवूणक केल्याचे तक्रारीत नमूद करण्यात आले आहे़ अंबड पोलीस ठाण्यात फसवणूक झालेल्या दोन महिलांनी तक्रार अर्ज दिले असून, त्यात एजंटांनी जिल्हा उद्योग केंद्रातून सुशिक्षित बेरोजगारांचे कर्ज सवलतीच्या दरात देतो, असे सांगत दोघांकडून ५० लाख कर्जासाठी सुमारे सहा लाखांहून अधिक रक्कम मे २०१२ ते आतापावेतो दिल्याचे म्हटले आहे़ या कर्जासाठी जातीनुसार बँकेकडून ५० ते ६५ टक्क्यांपर्यंत सबसिडी (सवलत) दिली जाणार असल्याचे सांगून नागरिकांकडून रक्कम जमा केली जात असे़ जिल्हा उद्योग केंद्रातून गेल्या दीड ते दोन वर्षापासून कर्ज मिळत नसल्याचे दिलेली रक्कम वारंवार परत मागूनही मिळत नसल्याचे लक्षात आल्यानंतर फसवणूक झालेल्या दोन महिलांनी अंबड पोलीस ठाणे गाठून तक्रार केली आहे़ (वार्ताहर)