नाशिक/ठाणे: राज्यातील महायुती सरकारमध्ये सर्व काही आलबेल नसल्याचे पुन्हा एकदा समोर आले आहे. भाजपचे दिग्गज नेते गणेश नाईक यांनी मुख्यमंत्री एकनाथ शिंदे आणि त्यांच्या शिवसेनेवर (शिंदे गट) केलेल्या जहरी टीकेमुळे महायुतीत वादाची मोठी ठिणगी पडली आहे. नाईक यांच्या विधानाचा निषेध करत आता शिवसेनेचे नेते आणि कॅबिनेट मंत्री दादा भुसे यांनी थेट मुख्यमंत्र्यांकडे दाद मागण्याचा निर्णय घेतला आहे.
ठाणे येथे बोलताना गणेश नाईक यांनी मुख्यमंत्री एकनाथ शिंदे यांच्यावर निशाणा साधला होता. "ठाणे हा एकनाथ शिंदेंचा बालेकिल्ला नाही," असे म्हणत नाईक यांनी खळबळ उडवून दिली. इतकेच नाही तर, "पक्षाने (भाजप) आदेश दिल्यास त्यांचे नामोनिशान मिटवून टाकू," असे प्रक्षोभक विधानही त्यांनी केले. या विधानामुळे ठाणे आणि नाशिकमधील शिवसैनिकांमध्ये संतापाची लाट उसळली आहे.
नाशिकमध्ये माध्यमांशी बोलताना दादा भुसे यांनी गणेश नाईक यांचे नाव न घेता त्यांना सुनावले. भुसे म्हणाले की, "आज प्रजासत्ताक दिनासारखा पवित्र दिवस आहे. अशा आनंदाच्या दिवशी महायुतीतील नेत्यांनी असे विधान करणे अत्यंत दुर्दैवी आहे. बाळासाहेब ठाकरे आणि धर्मवीर आनंद दिघे यांचा वारसा एकनाथ शिंदेच पुढे नेत आहेत, हे सर्वांना ठाऊक आहे."
"गणेश नाईकांचे कुळ आणि मूळ शिवसेनाच"
नाईक यांना त्यांच्या राजकीय प्रवासाची आठवण करून देताना भुसे पुढे म्हणाले, "गणेश नाईक यांचे कुळ आणि मूळ हे शिवसेनाच आहे, हे त्यांनी विसरू नये. त्यामुळे त्यांनी जबाबदारीने बोलले पाहिजे. यासंदर्भात आम्ही सर्व नेते लवकरच मुख्यमंत्र्यांची भेट घेऊन आपली भूमिका मांडणार आहोत."