राज ठाकरेंची आज विक्रोळीमध्ये सभा होत आहे. या सभेला ठाकरे गटाचे राज्यसभा खासदार संजय राऊत यांना निमंत्रण देण्यात आले आहे. राऊत यांच्यासाठी व्यासपीठावर एक खूर्ची रिकामी ठेवणार असल्याचेही मनसेने जाहीर केले आहे.
मनसे नेते मनोज चव्हाण यांनी ही माहिती दिली आहे. विक्रोळीमध्येराज ठाकरे यांची सभा आहे, संजय राऊत यांना जाहीर निमंत्रण करतो की त्यांच्यासाठी सभेत एक खूर्ची रिकामी ठेवली जाणार आहे. तुमच्यासारखे शिकले सवरलेले व्यक्ती आहेत, प्रवक्तेपदाच्या माध्यमातून तुमच्या डोक्याला जो गंज चढला आहे. जे बेताल बोलणे सुरु आहे, ते बोलणे कसे असले पाहिजे. वकूब असला पाहिजे. राज ठाकरेंचे विचार, राजकीय माणसाचे विचार कसे असले पाहिजे हे ऐकण्यासाठी या, असे चव्हाण म्हणाले.
तसेच तुम्ही तुमची पातळी सोडून प्रवक्तेगिरी करायला लागला आहात. ही पातळी पूर्वपदावर येण्यासाठी राज यांची सभा ऐकणे गरजेचे आहे. विचारांची देवाणघेवाण कशी असावी हे शिकण्यासाठी तुम्ही आजच्या विक्रोळीच्या सभेला यावे अशी आमची विनंती आहे. तुमच्यासाठी खूर्ची मोकळी ठेवलेली आहे, असे चव्हाण म्हणाले.