Heatwave: तिकडे अकोला, वर्धा देशात सर्वाधिक ‘हॉट’, इकडे सांगलीमध्ये गारांसह वादळी पाऊस!

Maharashtra Heatwave: रविवारी देशातील सर्वाधिक ४५ अंश सेल्सिअस तापमान अकोला व वर्धा शहरात नोंदविले गेले. 

लोकमत न्यूज नेटवर्क
मुंबई/अकोला : पुढील तीन दिवस राज्यभरात ठिकठिकाणी अवकाळी पाऊस पडेल, असा इशारा हवामान खात्याने दिला असतानाच रविवारी महाराष्ट्रात उष्मा वाढला होता. तर सांगली जिल्ह्यात गारांचा पाऊस पडला. 

रविवारी देशातील सर्वाधिक ४५ अंश सेल्सिअस तापमान अकोला व वर्धा शहरात नोंदविले गेले. विदर्भातील सर्वच शहरांचा पारा ४१ अंशांवर गेला असून, नागपूर, अमरावती शहरांचे तापमानही ४४ अंशापेक्षा जास्त नोंदविण्यात आले. रविवारी सायंकाळी अचानक आलेल्या वादळी पावसाने मिरज, तासगाव तालुक्यासह सांगली, मिरज आणि कुपवाड या शहरांना झोडपून काढले. 

भारतातील टॉप ५ सर्वाधिक उष्ण शहरे (एप्रिल २०२६)

क्रमांक	शहर	राज्य	तापमान (अंश सेल्सिअसमध्ये)
१	अकोला	महाराष्ट्र	४५.०°C
२	वर्धा	महाराष्ट्र	४५.०°C
३	प्रयागराज	उत्तर प्रदेश	४४.६०°C
४	राजनांदगाव	छत्तीसगड	४४.५०°C
५	नागपूर	महाराष्ट्र	४४.४०°C

मराठवाडा ४० अंशांवर

विदर्भासह मराठवाड्यातील सर्व प्रमुख शहरांचेही तापमान ४० अंशांच्या पुढे गेले आहे. तर उत्तर महाराष्ट्रातील  जळगाव आणि पश्चिम महाराष्ट्रातील  पुणे, सांगली, सातारा, सोलापूर या शहरांचे तापमान ४० ते ४३ अंशांपर्यंत गेले आहे. विदर्भात पुढच्या दोन दिवसांसाठी हवामान खात्याने पावसाचा यलो अलर्ट जारी केला आहे. \\

विदर्भातील शहरांचे तापमान (ताज्या नोंदीनुसार)

शहर	तापमान (अंश सेल्सिअसमध्ये)
अमरावती	४४.२०°C
गोंदिया	४३.५०°C
यवतमाळ	४३.२०°C
ब्रह्मपुरी	४३.२०°C
गडचिरोली	४३.२०°C

कोकणात ढगाळ वातावरण अवकाळीची शक्यता कमी

विदर्भ, खान्देशच्या तुलनेत मध्य महाराष्ट्र, मराठवाड्यात अवकाळी पावसाचे प्रमाण अधिक असेल. कोकणात अवकाळी पावसाची शक्यता कमी आहे. तिथे ढगाळ हवामान राहील. सोमवारी, मंगळवारी आणि बुधवारी मध्य महाराष्ट्र, मराठवाड्यात अवकाळी पावसाची शक्यता आहे.