ऑनलाइन लोकमत
वसई, दि. 14 - वसईतील तुंगारेश्वर धबधब्यात बुडून ३ तरुणांचा मृत्यू झाला तर चुळणे तलावात बुडून एक तरुण मृत्युमुखी पडल्याची दुर्दैवी घटना घडली आहे. खलील शेख (२२), अमोल जगताप(२०) आणि आसिफ शेख (२२) यांचा तुंगारेश्वर येथे बुडून मृत्यू झाला. तर सलमान पठाण (१८) याचा तलावात बुडून मृत्यू झाला. कांदिवली येथील ५ मित्र रविवारी तुंगारेश्वर येथे फिरायला आले होते. शंकर मंदिरात दर्शन करून पाचही जण धबधब्याच्या वरच्या बाजूला खडकावर बसले होते. त्यातील एकाचा पाय घसरल्याने तो खाली धबधब्यात वाहून जाऊ लागला. त्याला वाचवण्यासाठी दोघे गेले असता तिघेही खाली डोहात बुडाले. पालिकेच्या अग्निशमन दलाच्या जवानांनी तिघांचे मृतदेह संध्याकाळी बाहेर काढले. संध्याकाळी नवघर माणकिपूर येथील चुळणे तलावात बुडून सलमान चा मृत्यू झाला. रात्री उशिरपर्यंत त्याचा मृतदेह हाती लागला नव्हता.