कोल्हापूर : येथील सेवानिवृत्त प्राध्यापिकेला डिजिटल अरेस्टची भीती घालून ३ कोटी ५७ लाख रुपयांचा गंडा घातल्याप्रकरणी कोल्हापूरपोलिसांनी पुण्यातून आणखी दोघांना ताब्यात घेतले आहे. यापूर्वी ताब्यात घेतलेल्या दोघांसोबतच या दोघांचीही कसून चौकशी सुरू आहे. या प्रकरणाची व्याप्ती पाहता देशाबाहेर आणि देशाबाहेरूनही हे रॅकेट चालवले जात असल्याची शक्यता व्यक्त होत आहे.
मनी लाँड्रिंगच्या खटल्याप्रकरणी डिजिटल अरेस्टची भीती घालून मीना मुरलीधर डोंगरे (वय ७५, रा. सम्राटनगर, कोल्हापूर) यांना एका टोळीने ३ कोटी ५७ लाख रुपयांचा गंडा घातला होता. काही दिवसांपूर्वी हा प्रकार उघडकीस आला. केवळ हे एकच प्रकरण नव्हे तर या सायबर भामट्यांनी २७ मे रोजी एकाच दिवसात ११ बँक खात्यांमधून अनेकांना १३ कोटींचा गंडा घातल्याचे समोर आले होते. यातील १० खात्यांवर २७ मे रोजी तब्बल १३ कोटी रुपये वर्ग झाले. हे सर्व पैसे इतर खात्यांमध्ये वर्ग करण्यात आले.
ही फसवणुकीची रक्कम चेन्नई, जयपूर, मुंबई, पुणे, पंजाब, आसाम, ओडिशा यासह विविध राज्यांतील १२ बँकांच्या वेगवेगळ्या ३९ खात्यांमध्ये वर्ग केल्याचे पोलिस तपासात आढळले. यानंतर आणखीन ७० बँक खात्यांची माहिती समोर आली असून पोलिसांनी आतापर्यंत १३० हून अधिक बँक खात्यांची तपासणी केली आहे. याच चौकशीतून ताब्यात घेतलेल्या चौघांची नावे समोर आली आहेत. यातून या चौघांना ताब्यात घेतले आहे.
समोरासमोर चौकशी
या प्रकरणी कोल्हापूर पोलिसांनी सुरुवातीला पिंपरी येथून एकास ताब्यात घेतल्यानंतर त्याच्या चौकशीतून आणखी एकाचे नाव समजले. या दोघांनाही ताब्यात घेऊन अधिक चौकशी केली असताना आणखी दोघांची नावे समोर आली आहेत. आता या चौघांची समोरासमोर बसवून चौकशी करण्यात येणार आहे.
२७ लाख रुपये मिळाले परत
पोलिसांनी या प्रकरणी आतापर्यंत २७ लाख रुपये परत मिळवले आहेत. ही रक्कम काही दिवसांतच फिर्यादी मीना मुरलीधर डोंगरे यांना परत करण्यात येणार असल्याचे पोलिसांनी सांगितले.