‘सीपीआर’चे मंडळ स्थापनेलाच वादग्रस्त

शासकीय नियुक्ती : ‘पत्रकार’ म्हणून कार्यकर्त्याची वर्णी

कोल्हापूर : येथील राजर्षी छत्रपती शाहू महाराज शासकीय वैद्यकीय महाविद्यालय व छत्रपती प्रमिलाराजे रुग्णालयाच्या अभ्यागत मंडळावरील (अ‍ॅडव्हायजरी बोर्ड) सदस्यांच्या नियुक्त्या शासनाच्या वैद्यकीय शिक्षण व औषधी द्रव्ये विभागाने शुक्रवारी जाहीर केल्या. त्यामध्ये ‘राष्ट्रीय वृत्तपत्राचा स्थानिक प्रतिनिधी’ म्हणून शिवसेनेच्या कार्यकर्त्याची वर्णी लावण्यात आली आहे. त्यामुळे स्थापनेलाच हे मंडळ वादग्रस्त बनले आहे. पत्रकारांनी त्याबद्दल पालकमंत्री चंद्रकांतदादा पाटील यांनाच धारेवर धरले. तुमचाही कारभार काँग्रेसवाल्यांसारखाच असल्याचे निदर्शनास आणून दिल्यावर आवश्यक ते बदल करण्याचे आश्वासन त्यांनी दिले. पालकमंत्री पाटील या मंडळाचे अध्यक्ष आहेत. सदस्यांमध्ये आमदार राजेश क्षीरसागर, अमल महाडिक यांच्यासह महेश जाधव, सुनील लक्ष्मण करंबे, शीतल सुभाष रामुगडे यांचा समावेश आहे. प्रतिष्ठित सामाजिक कार्यकर्त्या म्हणून डॉ. सुरेखा नरेंद्र बसरगे, प्रतिष्ठित तज्ज्ञ म्हणून डॉ. इंद्रजित बळिराम काटकर, तज्ज्ञ म्हणून डॉ. अजित भैरवनाथ लिके यांची वर्णी लावली आहे. ‘राष्ट्रीय वर्तमानपत्राचा स्थानिक प्रतिनिधी’ म्हणून अजित दत्ताजी गायकवाड यांची नियुक्ती झाली आहे; परंतु ते स्वत: कोणत्याच वृत्तपत्राचे काम करीत नाहीत. या निवडी जाहीर झाल्यावर त्यांना विचारणा केल्यावर ते स्वत:ही ‘पत्रकार’ म्हटल्यावर आश्चर्यचकित झाले. गायकवाड हे शिवसेनेचे कार्यकर्ते असून, पंचगंगा तालीम परिसरातून त्यांच्या पत्नीने यापूर्वी निवडणूक लढविली आहे.पंधरा जणांच्या मंडळावर पाच शासकीय सदस्य आहेत. त्यामध्ये या महाविद्यालयाचे अधिष्ठाता, आरोग्य उपसंचालक, महापालिका आरोग्य समितीचे प्रमुख, वैद्यकीय महाविद्यालयातील कर्मचाऱ्यांचे प्रतिनिधी व विभाग प्रमुखांचा समावेश आहे. सीपीआर बचाव समितीतील कुणाची तरी या मंडळावर निवड लागेल, अशीही लोकांना अपेक्षा होती; परंतु त्यांनी फक्त आंदोलनच करावे, असा विचार सरकारने केल्याचे दिसते आहे.देशी दारूची दुकानेया मंडळावर नियुक्ती झालेल्या एका सदस्याची संभाजीनगरला व परिते (ता. करवीर) येथे देशी दारूची दुकाने आहेत. अशा व्यक्तीची मंडळावर नियुक्ती करून त्यांनी शाहू महाराजांच्या नावाने असलेल्या या वैद्यकीय महाविद्यालयास नेमका कोणता सल्ला द्यावा, अशीही चर्चा आता सुरू झाली आहे.