हिंगोली : राज्यात कोरोनाचा वाढता प्रादुर्भाव लक्षात घेता वैद्यकीय शाखेच्या परीक्षा घेणे धोक्याचे असून, त्या पुढे ढकलण्याची मागणी करणारे ट्विट खा. ॲड. राजीव सातव यांनी केल्यानंतर वैद्यकीय शिक्षणमंत्री अमित देशमुख यांनी दखल घेतली, तर विद्यार्थ्यांचे नुकसान होऊ नये यासाठी प्रयत्न करणार असल्याचे आश्वासनही दिले.
या संदर्भात खासदार ॲड. सातव यांनी वैद्यकीय शिक्षण घेणाऱ्या विद्यार्थ्यांच्या परीक्षेसंदर्भात ट्विटरवरून सूचना मांडली. तसेच पत्रही दिले होते. राज्यात कोरोनाचा प्रादुर्भाव वाढू लागला आहे. आता वैद्यकीय अभ्यासक्रमाच्या परीक्षा असून, राज्यभरातून सुमारे ५० हजारांवर विद्यार्थी या परीक्षेला बसणार आहेत. सध्याच्या परिस्थितीत अशा परीक्षा घेणे धोक्याचे आहे. विद्यार्थ्यांच्या आरोग्याचा प्रश्न लक्षात घेता परीक्षा पुढे ढकलण्याची मागणी सातव यांनी देशमुख यांच्याकडे केली होती. यावर मंत्री देशमुख यांनी या परिस्थितीचे बारकाईने निरीक्षण करीत आहे. कोविडच्या दुसऱ्या लाटेत वैद्यकीय शिक्षण घेणाऱ्या विद्यार्थ्यांचे नुकसान होऊ नये, यासाठी सर्वतोपरी प्रयत्न करणार आहे. संबंधित विभागाला विश्वासात घेऊन परीक्षेबाबत लवकरच योग्य तो निर्णय घेण्याचे आश्वासनही देशमुख यांनी दिले आहे.