फेसबुकवर मैत्री जमली, शेअर मार्केटमध्ये १८ लाखांना फसवले

दोन वर्षांपासून सुरू होता व्यवहार, फेसबुकवरील दोस्ती महागात पडली

गोंदिया : फेसबुकवर झालेल्या दोस्तीतून शेअर मार्केटमध्ये पैसे गुंतविण्याचा नाद केला आणि तब्बल १८ लाख १९ हजार ४४ रूपये गमावून बसणाऱ्या मेकॅनिकल इंजिनियरने हतबल होऊन तिरोडा पोलिसात शनिवारी (दि.१८) तक्रार केली. त्यांना शेअर मार्केटमध्ये पैसे गुंतवून नफा कमवून देण्याच्या नावावर दोन वर्षांपासून दाेस्ती करणाऱ्या व्यक्तीने गंडविले आहे. वर्धनराज एस (रा. अशोकनगर, चेन्नई) असे आरोपीचे नाव आहे.

तिरोडा तालुक्यातील ग्राम ठाणेगाव येथील फेकचंद नकटू पटले (३७) हा तरूण ओमान या देशात मागील १४ वर्षांपासून मेकॅनिकल इंजिनियर म्हणून कार्यरत आहेत. फेकचंद पटले ओमान देशातून आपल्या गावी ठाणेगाव येतात व सुटी संपल्यानतर परत कामावर ओमान येथे जातात. ओमान येथे असताना फेसबुकचा वापर करीत असून वर्धराजन याची निफ्टी बॅकनिफ्टी पोस्ट बघायचे. त्यानुसार २९ नोव्हेंबर २०२१ मध्ये पटले याने वर्धराजन याला फेसबुकवर संदेश पाठविले व वर्धराजन यांच्याशी व्हॉट्सॲपवर सगळी माहिती विचारली.

वर्धराजनने तुम्ही मला आपले डीमॅट अकाउंट वापरु दिल्यास तुम्हाला स्टॉक मार्केट मध्ये भरपूर फायदा करुन देऊ शकतो असे आमिष दिले. तसेच जो लाभ होईल त्यातील १० टक्के रक्कम वर्धराजन यांच्या अकाऊंटवर टाकण्याचे तसेच जर कॅपिटल अमाऊंटचे नुकसान झाले तर तो अमाऊंट रिकव्हर झाल्यावर होणाऱ्या नफ्याचे ३० टक्के वर्धराजन यांना देण्याचे दोघांत ठरले. फेकचंद पटले यांना नफा मिळवून देण्याचे आमिष देत वर्धराजन याने त्याची तब्बल १८ लाख १९ हजार ४४ रूपयांनी फसवणूक केली. या घटनेसंदर्भात तिरोडा पोलिसांनी भादंवि कलम ४२० अन्वये गुन्हा दाखल केला आहे. तपास पोलिस उपनिरीक्षक दलालवाड यांनी करीत आहेत.

डिमॅट अकाऊंटचे अधिकार आरोपीला दिले होते
ठाणेगाव येथील फेकचंद पटले याला आरोपी वर्धराजन याने तुमचे डिमॅट अकाऊंटचे अधिकार द्या नफा मिळवून देतो असे म्हटले होते. यावर पटले याने झेरोधा डिमॅट अकाऊंटचे सगळे अधिकार त्याला दिले. २९ नोव्हेंबर २०२१ रोजी १९९९ रूपये भरून फेकचंद पटले यांनी त्याच्या कंपनीत सदस्यत्व मिळवून पटले वर्धराजन याला युजर अकांऊट, पासवर्ड, पीननंबर व्हॉटसॲपवर पाठविले होते.

१७.७७ लाखाचे नुकसान असताना स्टेटस ५.४५ लाख नफ्याचा
वर्धराजन याने २ डिसेंबर २०२१ रोजी झेरोधा डिमॅट अकाऊंटवरून १७ लाख ९९ हजार ६१५ रूपयांची ट्रेडिंग केली. त्या दिवशी वर्धराजन १७ लाख ७७ हजार ७४४ रूपयांनी तोट्यात गेला. परंतु त्याचवेळी वर्धराजनने पाच लाख ४५ हजार ७०४ रूपये नफा झाल्याचा स्टेटस ठेवला होता. त्या स्टेटसचा स्क्रीन शॉट घेऊन वर्धराजनला पाठविले व त्याला या संदर्भात पटले यांनी विचारपूस केली. त्यावर मी ऑफिसमध्ये नव्हतो. ऑफिसच्या मुलाला नेफ्टी सीई बाय करायला सांगितले होते. पण त्याने नेफ्टी पे बाय केल्याचे सांगत नुकसान झाल्याचे म्हटले.

म्हणे महिनाभरात रिकव्हरी करून देतो
झालेले नुकसान भरून काढणार नाही तेव्हापर्यंत ३० टक्के घेणार नाही असे राजवर्धन म्हणाला. ३ डिसेंबर २०२१ ला वर्धराजन याने फेकचंद पटले याच्या झेरोधा डिमॅट अकाऊंटमध्ये असलेल्या २१ हजार ८७० रुपयांची ट्रेडिंग करुन २३ हजार ९७१ रुपयांचा नफा केला. झालेल्या नफ्यातून ३० टक्के रकमेची मागणी केली नाही. पटले यांना फोन करून दोन आठवडे ते एक महिन्यात तुमचे नुकसान रिकव्हर करून देण्याची हमी दिली.

फेसबुक आणि व्हॉट्सॲप केले ब्लॉक केले
पटले यांची तोट्यात असलेली रक्कम रिकव्हर करण्यासंदर्भात वर्धराजनला म्हटले असता त्याने कॅपिटल अमाऊंट रिकव्हर करून देण्यास नकार दिला. पटले यांना वर्धराजन वारंवार आमिष देऊन त्याची १८ लाख १९ हजार ४४ रूपयांनी फसवणूक केली. एवढेच नाही तर फेकचंद पटले याचा व्हॉट्सॲप व फेसबुकला आरोपीने ब्लॉक केले आहे.