'ते' भाषण गौतम खट्टर यानेच लिहिले, भाषणाबाबत नवा ट्विस्ट; माधव खट्टरला जामीन

माधव खट्टर याला वास्को येथील प्रथम वर्ग न्यायालयाने जामीन मंजूर केला.

लोकमत न्यूज नेटवर्क, पणजी: वास्को येथील कार्यक्रमात गौतम खट्टर याने केलेल्या आक्षेपार्ह भाषणाची रचना खुद्द गौतम यानेच केली होती आणि त्यात माधव खट्टरचा थेट सहभाग नव्हता, असा खुलासा पोलिसांनी केला आहे. त्यानंतर माधव खट्टर याला वास्को येथील प्रथम वर्ग न्यायालयाने जामीन मंजूर केला.

सेंट फ्रान्सिस झेवियर यांच्याविषयीच्या आक्षेपार्ह भाषण प्रकरणात वास्को येथील प्रथम वर्ग न्यायालयात संशयित माधव खट्टरच्या जामीन अर्जावर मंगळवारी सुनावणी झाली. या सुनावणीदरम्यान पोलिसांनी महत्त्वाचे स्पष्टीकरण दिले. आक्षेपार्ह भाषणाची मजकूर रचना गौतम खट्टरनेच सहभाग केली असून त्यामध्ये माधव खट्टरचा थेट नसल्याचे पोलिसांनी न्यायालयात स्पष्ट केले. या निवेदनामुळे प्रकरणाला वेगळे वळण मिळाले.

दोन्ही बाजूंकडून युक्तिवाद

सरकारी बाजूने आणि बचाव पक्षाकडून सविस्तर युक्तिवाद करण्यात आला. बचाव पक्षाने माधव खट्टरचा या भाषणाशी संबंध नसल्याचा मुद्दा ठामपणे मांडला, तर सरकारी बाजूने प्रकरणाच्या गांभीर्याकडे लक्ष वेधले. न्यायालयाने दोन्ही बाजूंचे युक्तिवाद ऐकून न्यायालयाने माधव खट्टरला जामीन मंजूर केला.

गौतम रुग्णालयात दाखल

दरम्यान, पर्वरी येथे पोलिस कोठडीत असताना गौतम याने छातीत दुखत असल्याची तक्रार केली. त्यामुळे त्याला म्हापसा येथील जिल्हा रुग्णालयात उपचारासाठी दाखल केले आहे. त्याच्यावर उपचार सुरू आहेत. गौतमला मंगळवारी नियमित वैद्यकीय तपासणीसाठी रुग्णालयात नेले होते. त्याने आपल्या छातीत दुखत असल्याची तक्रार केली. डॉक्टरांनी त्याला रुग्णालयात दाखल करून घेण्याचा सल्ला दिला. कडक पोलिस बंदोबस्तात रात्री उशीरा त्याला रुग्णालयात आणले होते. बाह्यरुग्ण विभागात तपासणीनंतर त्याला दाखल करून घेतले. रुग्णालयातील डॉक्टर त्याच्या प्रकृतीवर लक्ष ठेवून आहेत. रुग्णालयाने याबाबत अधिक माहिती देण्यास नकार दिला. खट्टर याने पत्रकारांच्या प्रश्नांना 'हर हर महादेव' म्हणत उत्तर देणे टाळले.