हिवताप हा कीटकजन्य आजार असून अनेक आजारांपैकी एक गंभीर व मानवाचा जीवघेणा आजार आहे. हिवताप हा प्लाझमोडियम या एकपेशीय परोपजीवी रोगजंतूपासून होतो.
कुठल्याही तापाकडे दुर्लक्ष करू नका. हा ताप मलेरिया असू शकतो. मलेरिया घातक ठरू शकतो. औषध विक्रेत्याच्या अथवा स्वत:च्या अल्प ज्ञानावर तापाकरिता परस्पर औषधे घेऊ नका. त्यासाठी नजीकच्या प्राथमिक आरोग्य केंद्रात, महानगरपालिकेच्या दवाखान्यात किंवा रुग्णालयात मलेरियासाठी सोपी व सुलभ रक्त तपासणी करून घ्या आणि डॉक्टरांच्या सल्ल्याने पूर्ण औषधोपचाराचा डोस घ्या. योग्य वेळी समूळ औषधोपचार केल्याने मलेरियाचा रुग्ण खात्रीने व हमखास बरा होतो.
मलेरिया पसरविणारे डास आपण साठविलेल्या स्वच्छ पाण्यात आढळतात. पाण्याच्या टाक्यात डासांची उत्पत्ती होऊ नये म्हणून त्या दुरुस्त करणे, त्यास झाकण बसविणे व गळती थांबविणे हे प्रत्येकाचे कर्तव्य आहे. दैनंदिन वापराच्या पाण्याकरिता घरामधील तसेच घराबाहेरील पिंपे आठवड्यातून दोनदा पूर्णपणे रिकामी व स्वच्छ करून पुन्हा भरणे व ती झाकून ठेवणे अत्यंत आवश्यक आहे. डासांचा उपद्रव पूर्णपणे टाळण्यासाठी पाण्याच्या सर्व टाक्या तसेच पिंपे इत्यादी साठे डास प्रतिबंध स्थितीत आणि व्यवस्थित झाकून ठेवा. इमारतीच्या गच्चीवर आणि परिसरात अनावश्यक पाणी साचू देऊ नका. परिसरातील घराजवळील पाण्याची डबकी वेळीच बुजवा किंवा वाहती करावीत.
वैयक्तिक सुरक्षिततेसाठी झोपताना विशेषत: कीटकनाशक भारित मच्छरदाणीचा वापर करावा. डास प्रतिबंधक यंत्रे, मलम, अगरबत्ती वापरावी. घराच्या खिडक्यांना बारीक जाळीचे पडदे लावावेत. तसेच डेंग्यू तापाची लागण झाल्यास घाबरून जाऊ नये. तज्ज्ञ डॉक्टरांच्या सल्ल्यानुसार रक्ताची तपासणी करावी व औषधोपचार घ्यावा, असे आवाहन जिल्हा हिवताप अधिकाऱ्यांनी केले आहे.