ज्ञानराज चौगुले : फिरत्या युनिटचे उद्घाटन
लोहारा : सास्तूर येथील प्राईड इंडिया स्पर्श ग्रामीण रुग्णालयाच्या चौथ्या फिरत्या वैद्यकीय आरोग्य पथकामुळे जिल्ह्याच्या आरोग्य सेवेला बळकटी प्राप्त झाली आहे, असे प्रतिपादन आ. ज्ञानराज चौगुले यांनी केले.
आदित्य बिर्ला कॅपिटलच्या सहकार्याने सुरु करण्यात आलेल्या फिरत्या मोबाईल मेडिकल युनिटचा लातूर परिमंडळाचे आरोग्य सेवा उपसंचालक डॉ. एकनाथ माले व आ. ज्ञानराज चौगुले यांच्या हस्ते फीत कापून व हिरवा झेंडा दाखवून शुभारंभ करण्यात आला. यावेळी ते बोलत होते. किरण गायकवाड, उमरगा तालुका आरोग्य अधिकारी डॉ. प्रताप शिंदे, स्पर्श ग्रामीण रुग्णालयाचे प्रकल्प अधिकारी रमाकांत जोशी, उमरगा तालुका शिवसेना प्रमुख बाबूराव शहापुरे, कार्यक्रम अधिकारी अच्युत आदटराव, डॉ. मीरा देशपांडे, डॉ. अशोक मस्के, डॉ. दीपिका चिंचोळी, डॉ. वैशाली जाधव, डॉ. युवराज हक्के, डॉ. प्रशांत जाधव, उमरगा, लोहारा, तुळजापूर तालुक्याच्या विविध गावातील सरपंच यावेळी उपस्थित होते. प्रास्ताविक रमाकांत जोशी यांनी केले.
चौकट.......
१२४ गावांत मिळणार सेवा
या चार फिरत्या मोबाईल मेडिकल युनिटमार्फत उस्मानाबाद व लातूर जिल्ह्यातील १२४ दुर्गम व अतिदुर्गम गावात आरोग्य सेवा दिली जाणार आहे. यात आरोग्य तपासणीसह औषधी, लसीकरण, गरोदरमाता तपासणी व उपचार, ज्येष्ठ नागरिक तपासणी व उपचार, प्रसूती पूर्व व पश्चात सेवा, रक्त, लघवी तपासणी, इ.सी.जी. आदी सेवा मिळणार असल्याचे प्रकल्प अधिकारी रमाकांत जोशी यांनी यावेळी सांगितले.