"दादा वाचव, हे मला मारतील!" बहिणीची शेवटची हाक अन् बरेलीत लव्ह मॅरेजचा रक्तरंजित शेवट!

प्रेमविवाहाच्या अडीच महिन्यानंतर शालिनी नावाच्या विवाहितेचा संशयास्पद मृत्यू झाला आहे. हुंड्यासाठी सासरच्यांनी तिची हत्या केल्याचा आरोप भावाने केला आहे.

उत्तर प्रदेशातील बरेलीमध्ये प्रेमविवाहाच्या अवघ्या अडीच महिन्यांतच एका विवाहितेचा संशयास्पद मृत्यू झाला आहे. 'सासरकडचे मला माहेरी जाऊ देत नाहीत, माझ्या जीवाला धोका आहे,' अशी आर्त हाक शालिनीने फोनवरून भावाला दिली होती. मात्र, भाऊ मदतीला पोहोचण्यापूर्वीच तिचा करुण अंत झाला.

प्रेमाचा गोड प्रवास लग्नानंतर अवघ्या ७५ दिवसांत रक्ताने माखला जाईल, अशी कल्पनाही कोणी केली नव्हती. बरेलीच्या सुभाषनगर परिसरात राहणाऱ्या शालिनीने आपल्या आवडीच्या मुलाशी लग्न केलं, पण लग्नानंतर काही दिवसांतच तिचं स्वप्न नरकात बदललं. शनिवारी शालिनीचा मृतदेह संशयास्पद स्थितीत तिच्या सासरी आढळला. याप्रकरणी माहेरच्या लोकांनी सासरच्यांविरोधात हुंड्यासाठी खून केल्याचा गंभीर आरोप केला आहे.

१९ फेब्रुवारीला थाटला होता संसार

बिहारीपूर वाल्मीकी मंदिर परिसरात राहणाऱ्या शालूने पोलिसांना दिलेल्या माहितीनुसार, त्याची बहीण शालिनीने १९ फेब्रुवारी रोजी अक्षय नावाच्या तरुणाशी प्रेमविवाह केला होता. सुरुवातीला सर्व काही सुरळीत होतं, मात्र लग्नानंतर काही दिवसांतच अक्षय आणि त्याच्या कुटुंबीयांनी शालिनीला हुंड्यासाठी त्रास देण्यास सुरुवात केली. "हुंड्यात कार घेऊन ये," असा तगादा सासरच्यांनी लावला होता. त्यासाठी शालिनीचा मानसिक आणि शारीरिक छळ केला जात होता.

तो शेवटचा फोन आणि जीवाचा धोका

२ मे रोजी सकाळी ८ च्या सुमारास शालिनीने रडत रडत आपल्या भावाला फोन केला. ती अत्यंत घाबरलेली होती. "मला हे लोक माहेरी येऊ देत नाहीत, मला इथे डांबून ठेवलं आहे. माझ्या जीवाला धोका आहे, मला वाचवा," अशी विनवणी तिने भावाकडे केली. या फोननंतर काही वेळातच अक्षयने शालूला फोन करून सांगितले की, "शालिनीची तब्येत ठीक नाहीये, ती काहीच बोलत नाहीये." शालू धावतच बहिणीच्या घरी पोहोचला, तेव्हा तिथे शालिनीचा मृतदेह पडलेला होता.

हुंडाबळीचा गुन्हा दाखल; ४ जणांविरुद्ध कारवाई

याप्रकरणी पोलिसांनी तातडीने कारवाई करत शालिनीचा पती अक्षय, सासू गीता, आकाश आणि अमन यांच्यासह इतर अज्ञात लोकांविरुद्ध 'हुंडाबळी' आणि हत्येच्या विविध कलमान्वये गुन्हा दाखल केला आहे. "आम्ही मृतदेह शवविच्छेदनासाठी पाठवला आहे. पीएम रिपोर्ट आल्यावर मृत्यूचे नेमके कारण स्पष्ट होईल. आरोपींची चौकशी सुरू आहे," अशी माहिती इन्स्पेक्टर सतीश कुमार नैन यांनी दिली.