'तुझे प्रेमसंबंध संपव'; आईच्या प्रियकराची मुलीच्या प्रियकराकडून निर्घृण हत्या, पुणे हारदरलं

पुण्यात आईच्या प्रियकराचा तरुणीच्या प्रियकराकडून हत्या करण्यात आल्याची खळबळजनक घटना समोर आली आहे.

Pune Crime : हडपसरमधील काळेपडळ परिसरात एक धक्कादायक घटना उघडकीस आली आहे. एका तरुणीसोबत असलेले प्रेमसंबंध तोडण्यासाठी सतत दबाव टाकणाऱ्या आणि धमकावणाऱ्या व्यक्तीची हत्या करण्यात आली आहे. महत्त्वाचे म्हणजे, ज्या व्यक्तीचा खून झाला तो त्या तरुणीच्या आईचा प्रियकर होता. या प्रकरणी काळेपडळ पोलिसांनी तपास करुन तरुणीच्या प्रियकरासह साथीदारांना अटक केली. या प्रकरणात अटकेत असलेला प्रियकर हा सराईत आहे. दुर्वांग उर्फ पारस सुनील मानकर , पारस किशोर गायकवाड, अभिजित उर्फ अभी संजय इंगळे, सोमनाथ रमेश दोरकर, साहिल सागर शेलार आणि चंद्रशेखर सोमनाथ जावीर यांना अटक करण्यात आली. गणेश संजू बिरादार असे खून झालेल्याचे नाव आहे.

खून प्रकरणातील मुख्य सूत्रधार दुर्गांग मानकर हा सराईत आहे. त्याच्याविरोधात गंभीर स्वरूपाचे पाच गुन्हे दाखल आहेत. दुर्वांग याचे एका तरुणीसोबत प्रेमसंबंध होते. तर गणेशचे दुर्वांगच्या प्रेयसीच्या आईसोबत प्रेमसंबंध होते. गणेश विवाहित होता. दुर्वांगची गुन्हेगारी पार्श्वभूमी असल्याने गणेशने तरुणीला त्याच्यासोबत असलेले प्रेमसंबंध तोडण्यास सांगितले होते. त्याने तिच्यावर दबाब आणला होता. गणेशने तरुणीच्या आईला त्यांच्या प्रेमसंबंधाची माहिती दिली होती. या कारणावरून दुर्वांग आणि गणेश यांच्यात वाद झाले होते.

३ मे रोजी हडपसरमधील ससाणेनगर भागात असलेल्या इमारतीच्या परिसरात रात्री साडेदहाच्या सुमारास गणेश थांबला होता. त्यावेळी आरोपी दुर्वांग आणि साथीदार तिथे आले. त्यांनी गणेशला शिवीगाळ करुन मारहाण करण्यास सुरुवात केली. गणेश याच्या डोक्यात सिमेंटचा गट्टू घालून आरोपी पसार झाले. गंभीर जखमी झालेल्या गणेशला रुग्णालयात दाखल करण्यात आले. उपचारादरम्यान त्याचा मृत्यू झाला. या प्रकरणी काळेपडळ पोलिसांनी खुनाचा गुन्हा दाखल केला. पसार झालेल्या आरोपींचा शोध घेण्यासाठी पोलिसांनी तीन पथके तयार केली. पसार झालेल्या आरोपींना सापळा लावून वेगवेगळ्या भागातून अटक करण्यात आली. आरोपींना न्यायालयाने पोलीस कोठडीत ठेवण्याचे आदेश दिले.