खामगावात धावत्या कारने घेतला पेट

खामगाव-नांदुरा रोडवर शॉर्टसर्किट झाल्याने धावत्या इंडिगो गाडीने घेतला पेट.

खामगाव : शॉर्टसर्किट झाल्याने धावत्या इंडिगो गाडीने पेट घेतल्याची घटना खामगाव-नांदुरा रोडवर दुपारी ४ वाजेच्या सुमारास घडली. यावेळी प्रसंगावधान राखून चालक व मालक गाडीबाहेर निघाल्याने सुदैवाने प्राणहानी टळलीे. शहरातील सार्वजनिक बांधकाम विभागात कार्यरत असलेले मिश्रा हे त्यांच्या इंडिगो गाडीने चालकासोबत नांदुरा येथे निघाले असता त्यांच्या गाडीत वायर जळाल्याचा वास आल्याने चालक व मिश्रा बाहेर निघाले. दरम्यान गाडीमधून धूर बाहेर निघून आगीच्या ज्वाळा भडकल्या गाडी बंद असतानाही ती काही वेळ पुढे चालत गेली. परंतु नागरीकांनी सतर्कता बाळगून गाडीच्या चाकाला दगड लावल्याने गाडी थांबली. या घटनेची माहिती तात्काळ नगर पालिकेच्या अग्निशमन विभागाला देण्यात आली असता अग्निशमन विभागही घटनास्थळी दाखल झाला. तसेच शहर पोलीसही उपस्थित झाले. दरम्यानच्या काळात गाडीचा समोरचा भाग पुर्णत: जळाला होता. आगीच्या ज्वाला भडकत असल्याने पोलिसांनीे सावधानता बाळगुन रस्त्याच्या दोन्ही बाजुची वाहतुक पूर्णपणे थांबविली होती. ही घटना पाहण्यासाठी बघ्यांची मोठय़ा संख्येने गर्दी झाली होती. यावेळी असंख्य नागरीकांना पेटत्या गाडीला आपल्या मोबाईलमध्ये फोटो घेण्याचा मोह आवरता आला नाही. तर दुसरीकडे गाडीचा स्फोट होवू शकतो अशी भीती निर्माण झाली होती. मात्र अग्निशमन विभागाने ता त्काळ तात्काळ घटनास्थळी पोहोचून गाडीला लागलेली आग विझवली. यामध्ये गाडीचे मोठय़ा प्रमाणात नुकसान झाले आहे.