शिक्षक बँकेच्या सभासदांना मिळणार ७ टक्के लाभांश

दि. अमरावती जिल्हा परिषद शिक्षक सहकारी बँकेच्या सभासदांना ७ टक्के लाभांश देण्याचा निर्णय...

आमसेभत निर्णय : हजारो सभासदांना होणार लाभ
अमरावती : दि. अमरावती जिल्हा परिषद शिक्षक सहकारी बँकेच्या सभासदांना ७ टक्के लाभांश देण्याचा निर्णय रविवार ११ सप्टेंबर रोजी अहिल्या मंगल कार्यालयात पार पडलेल्या वार्षिक आमसभेत सर्वानुमताने घेण्यात आला. या निर्णयाचा लाभ शिक्षक बँकेच्या हजारो सभासदांना मिळणार आहे.
शिक्षकांची जिव्हाळ्याची बँक म्हणून ओळखली जाणारी दि अमरावती जिल्हा परिषद शिक्षक सहकारी बँकेची वार्षिक आमसभा रविवार बँकेचे अध्यक्ष गोकुल राऊत व संचालकांचे उपस्थितीत पार पडली. यावेळी संचालक मंडळाच्यावतीने बँकेच्या आगामी प्रगतीसाठी नवीन ध्येयधोरणे मांडलेत. शिवाय यासभेत ३१ मार्च १६ पर्यंतच्या आर्थिक वर्षाचा अहवाल, हिशेबांची पत्रके, अंदाज पत्रक, नफा वाटणीला सभासदांची मंजुरी घेणे आदी विषयांवर सभेत चर्चा करण्यात आली. याशिवाय बँकेचे मय्यत सभासदांच्या कल्याण निधीत शिक्षक बँकेने भरघोस वाढ करण्याचा निर्णय घेतला आहे. यामुळे आता मय्यत सभासदांच्या कुटूंबियांना १० लाख रूपयांचा मदत निधी दिला जाणार आहे. यापूर्वी मय्यत कल्याण निधीतून ४ लाख रूपये मदत केली जात होती. मात्र यात बदल केल्याने त्यांना आता १० लाखांची मदत दिली जाईल. यासाठी दरमहा २५० रूपये वर्गणी द्यावी लागणार आहे. यासोबतच बँकेची मुख्य कार्यालयाची इमारत जीर्ण झाल्याने नवीन प्रशासकीय इमारत बांधण्याचा निर्णय सभेत झाला. बँकेमार्फत सुकन्या योजना राबविण्यासाठी मुलीचे वय ३ महिने ते १० वर्षांपर्यंत राहील. १८ व्या वर्षी ५० टक्के, तर २० व्या वर्षी पूर्ण रक्कम मिळणार असून यासाठी ९.५० व्याजाचा लाभ मिळणार आहे.
बँकेत आगामी काळात १४५ कर्मचाऱ्यांची भरती केली जाणार असून याबाबतच्या ठरावालाही मान्यता देण्यात आली. चर्चेत सुनील कुकडे, सुरेंद्र मेटे, नयन काळबांडे व अन्य सभासदांनी प्रश्न मांडलेत. व्याजदरात १ टक्का कमी करण्याची मागणी कुकडे व सदस्यांनी केली. सभेला अध्यक्ष गोकुल राऊत, उपाध्यक्ष सुनील केने, संचालक संजय भेले, किरण पाटील, प्रफुल्ल शेंन्डे, अ.राजिक हूसेन, ज्ञानेश्र्वर घाटे, प्रमोद ठाकरे, राजेंद्र गावंडे, मनोज ओंळबे, विजय पुसरलेकर, उमेश गोदे, नीळकंठ यावले, अजयानंद पवार, शैलेश चौकसे, छोटूसिंग सोमवंशी, सुदाम राठोड, मधुकर चव्हाण, रवींद्र निघोंट, सुनीता लहाने, अर्चना सावरकर, सरव्यवस्थापक राजेश देशमुख आदी उपस्थित होते. अध्यक्ष गोकुल राऊत यांनी यावेळी मार्गदर्शन करतांना बॅकेत नवीन बदल होत असल्याने काही धोरण संचालक मंडळाच्या समन्वयातून महत्त्वाचे निर्णय आमसभेत सभासदा समोर मांडल्याचे त्यांनी सांगितले. यावेळी आमसभेला जिल्हा भरातील शिक्षक बँकेचे सभासद मोठ्या संख्येने सहभागी झाले होते. (प्रतिनिधी)