मोठी बातमी; सोलापूरचा पारा ४२.५ अंशांवर;  सूर्य ओकतोय आग, जनजीवन विस्कळीत !

​गेल्या काही दिवसांपासून तापमानात सातत्याने वाढ होत आहे.

आप्पासाहेब पाटील/सोलापूर : सोलपूरसह राज्यात उन्हाचा कडाका दिवसेंदिवस वाढत चालला असून आज तापमानाने चाळीशी ओलांडली आहे. आज दुपारी कमाल तापमानाची नोंद ४२.५° सेल्सिअस (१०८.५° फॅरनहाइट) इतकी झाली, ज्यामुळे नागरिक अक्षरशः घामाघूम झाले आहेत. ​गेल्या काही दिवसांपासून तापमानात सातत्याने वाढ होत आहे. आजची आकडेवारी पाहता उन्हाच्या तीव्रतेने उच्चांक गाठला आहे. 

​सकाळी १० वाजल्यापासूनच उन्हाच्या झळा लागायला सुरुवात होत आहे. दुपारी १२ ते ४ या दरम्यान तापमानाचा पारा ४२ अंशांच्या वर गेल्याने शहरातील मुख्य रस्त्यांवर शुकशुकाट पाहायला मिळत आहे. हवेतील आर्द्रता कमी (२८%) असल्याने कोरड्या उन्हामुळे अंगाची लाहीलाही होत आहे. राज्यातील सर्वात उष्ण शहर म्हणून ओळख असलेल्या सोलापूरमध्ये उन्हाचा तडाखा आता असह्य होऊ लागला आहे. गेल्या दोन दिवसांपासून सोलापूरचे तापमान ४१.६°C ते ४२.५°C च्या दरम्यान स्थिरावले असून, दुपारच्या वेळी रस्ते ओस पडू लागले आहेत.

हवामान खात्याने दिलेल्या अंदाजानुसार, पुढील आठवडाभर उष्णतेची ही लाट कायम राहण्याची शक्यता आहे. ​सकाळपासूनच उन्हाच्या झळा जाणवू लागतात आणि दुपारी १२ वाजेपर्यंत तापमानाचा पारा चाळीशी ओलांडतो. यामुळे दुपारी १२ ते ४ या वेळेत सोलापूरच्या प्रमुख बाजारपेठा आणि रस्त्यांवर शुकशुकाट पाहायला मिळत आहे. उष्ण वाऱ्यांमुळे नागरिक घराबाहेर पडणे टाळत असून, उष्म्यापासून बचावासाठी शहाळी, ताक आणि शीतपेयांच्या गाड्यांवर गर्दी वाढली आहे.