ढेबेवाडी येथे चौदा वर्षांपासून ग्रामीण रुग्णालय कार्यरत आहे. रुग्णालयाच्या नवीन सुसज्ज इमारतीत एक शस्त्रक्रिया विभाग व इतर वैद्यकीय सुविधा उपलब्ध आहेत. नियमित शंभरवर आणि मंगळवारी आठवडा बाजाराच्या दिवशी दोनशेवर येथील ओपीडी असते. त्याशिवाय मधुमेह, रक्तदाब यांच्यासह अन्य आजारांचे नियमित उपचाराखालील रुग्णही या रुग्णालयाशी जोडलेले आहेत. काही महिन्यांपासून विभागात कोरोनाचा फैलाव वाढला होता. त्या पार्श्वभूमीवर येथील ग्रामीण रुग्णालयात कोरोना हॉस्पिटल सुरू करण्यात आले.
वैद्यकीय अधीक्षक डॉ. डी. बी. डोंगरे, डॉ. जगताप यांच्या मार्गदर्शनाखाली वैद्यकीय अधिकारी व कर्मचाऱ्यांच्या पथकाने रात्रंदिवस मेहनत घेऊन हॉस्पिटलचे कामकाज सांभाळले. कोरोना हॉस्पिटलमुळे नियमित रुग्णांना ग्रामीण रुग्णालयात प्रवेशबंदी होती. परिणामी उपचारासाठी दाही दिशा फिरण्याची वेळ त्यांच्यावर आली होती. काहींना वेळेत उपचार न मिळाल्याने गंभीर स्थिती ओढवली. सध्या कोरोनाचा फैलाव कमी झाल्याने कोरोना हॉस्पिटल बंद करून नियमित उपचार सेवा पूर्ववत सुरू करण्यात आली आहे. ही सेवा सुरू करण्यापूर्वी रुग्णालयाचे पूर्ण निर्जंतुकीकरण करण्यात आले. रुग्णालय पूर्ववत सुरू झाल्याने उपचारास येणाऱ्या नियमित रुग्णांची संख्या हळूहळू वाढायला लागली आहे.
- चौकट
१०२ रुग्ण दाखल; ६३ कोरोनामुक्त
गृहराज्यमंत्री शंभुराज देसाई यांच्या विशेष प्रयत्नाने ग्रामीण रुग्णालयातील नियमित कामकाज बंद ठेवून ९ सप्टेंबरपासून कोरोना रुग्णालय येथे सुरू करण्यात आले होते. साडेतीन महिन्यात १०२ कोरोना बाधित रुग्ण येथे उपचारासाठी दाखल झाले. त्यातील ३६ रुग्णांना पुढील उपचारासाठी अन्यत्र पाठविण्यात आले, तर येथे उपचार घेऊन ६३ रुग्ण बरे झाले. तिघांचा मृत्यू झाला.