मंगळवार तळे सुशोभीकरणाची मुहूर्तमेढ!

पालिकेत ठराव मंजूर : ‘लोकमत’ वर अभिनंदनाचा वर्षाव; घातक प्रदूषणाच्या प्रश्नावरून सुरू केलेल्या मोहिमेस यश

सातारा : येथील ऐतिहासिक मंगळवार तळ्याच्या दुरवस्थेबाबत ‘लोकमत’ ने केलेल्या उठावाला यश आले आहे. तळ्याच्या सुशोभीकरणासाठी १ कोटी ८५ लाखांच्या खर्चाच्या प्रस्तावाला पालिकेने गुरुवारी झालेल्या सर्वसाधारण सभेत मंजुरी दिली. या सुशोभीकरणासाठी जिल्हा नियोजनमधून खर्च करण्यात येणार आहे. तळे परिसरात राहणाऱ्या नागरिकांना न्याय मिळवून देण्यात ‘लोकमत’ने राबविलेल्या जागरण मोहिमेचे नगरविकास आघाडीचे पक्षप्रतोद अविनाश कदम यांनी भरसभेत जाहीर अभिनंदन केले. पर्यावरणपूरक गणेशोत्सवासाठी ‘लोकमत’ ने गेल्या पंधरा दिवसांपासून जनजागृती मोहीम सुरू केली आहे. या तळ्यात गणेशमूर्ती विसर्जनामुळे तळ्यातील पाणी प्रदूषित होऊन परिसरातील नागरिकांचे आरोग्य धोक्यात आले. ‘लोकमत’ने येथील नागरिकांच्या व्यथा वृत्तमालिकेच्या माध्यमातून मांडल्या. दरम्यान, राजघराण्याच्या ताब्यात असणाऱ्या या तळ्यात विसर्जनाला खासदार उदयनराजे भोसले यांनी बंदी घातली. सुशोभीकरणाचा निर्धारही व्यक्त केला होता. त्या अनुषंगाने ‘लोकमत’ने पर्यावरणपूरक गणेशमूर्ती विसर्जनासाठीही पालिकेला पर्याय सुचविले. शहरातील ऐतिहासिक हौद, शेततळी आणि पोहण्याचा तलाव या साधनांमध्ये शहरातील घरगुती गणेशमूर्तींचे तसेच चार फुटांपर्यंत उंची असणाऱ्या गणेशमूर्तींचे विसर्जन करता येणे शक्य आहे. हेही दाखवून दिले. ‘लोकमत’च्या वृत्तमालिकेची दखल घेऊन पालिकेने मंगळवार तळे सुशोभीकरण करण्याच्या खर्चाला मंजुरी देण्याबाबत कार्यालयाकडून आलेल्या अहवालावर चर्चा करून निर्णय घेणे हा विषय मंजुरीसाठी आला व मंजुरी घेण्यात आली. याबाबत सभेला माहिती देताना नगरविकास आघाडीचे पक्षप्रतोद अविनाश कदम म्हणाले, ‘लोकमत व कर्तव्य सोशल गु्रप’च्या माध्यमातून पर्यावरणपूरक गणेशोत्सवासाठी प्रयत्न सुरू आहेत. त्यांच्या मार्गदर्शनानुसारच पालिकेने काही महत्त्वाचे निर्णय घेतले आहेत. खासदार उदयनराजे भोसले व आमदार शिवेंद्रसिंहराजे भोसले यांनी जिल्हा नियोजनच्या निधीतून तळ्याच्या सुशोभीकरणाचा निर्धार केला असून, नोव्हेंबरमध्ये या कामाला सुरुवात होणार आहे. (प्रतिनिधी)