1 / 6निसर्गाच्या सौंदर्याने नटलेल्या लडाखमध्ये अशा अनेक गोष्टी आहेत ज्या पर्यटकांना थक्क करतात. मात्र, लेह-कारगिल-श्रीनगर हायवेवर असलेलं एक ठिकाण विज्ञानाच्या नियमांनाच आव्हान देताना दिसतं. समुद्रसपाटीपासून १४,००० फूट उंचीवर असलेल्या या जागेला 'मॅग्नेटिक हिल' असं म्हणतात. इथे गाडीचं इंजिन बंद असूनही ती आपोआप डोंगराच्या दिशेने वर खेचली जाते. हा एखादा चमत्कार आहे की चुंबकीय शक्ती? जाणून घेऊया यामागचं रंजक सत्य.2 / 6मॅग्नेटिक हिलवर प्रशासनाने रस्त्यावर एक विशिष्ट 'बॉक्स' मार्क केला आहे. जेव्हा पर्यटक आपली गाडी या बॉक्समध्ये आणून 'न्यूट्रल' गिअरमध्ये उभी करतात, तेव्हा एक अजब प्रकार घडतो. गाडी खाली घसरण्याऐवजी हळूहळू ताशी १० ते २० किमी वेगाने डोंगराच्या दिशेने, म्हणजेच वरच्या बाजूला सरकू लागते. गुरुत्वाकर्षणाच्या नियमानुसार एखादी वस्तू उतारावरून खाली जायला हवी, पण इथे मात्र गाडी चढावर जाताना दिसते.3 / 6अनेक लोक मानतात की या डोंगराच्या पोटात मोठा चुंबक आहे, पण सत्य काही वेगळंच आहे. संशोधकांनुसार, हे कोणतंही जादू किंवा चुंबकीय क्षेत्र नसून एक 'ऑप्टिकल इल्यूजन' म्हणजेच 'दृष्टीभ्रम' आहे. या रस्त्याच्या आसपासच्या टेकड्यांची रचना आणि भौगोलिक परिस्थिती अशी आहे की, जो रस्ता प्रत्यक्षात उताराचा आहे, तो डोळ्यांना चढाचा वाटतो.4 / 6क्षितिज स्पष्ट दिसत नसल्यामुळे आणि आसपासच्या डोंगररांगांच्या कोनामुळे आपला मेंदू गोंधळतो. गाडी प्रत्यक्षात गुरुत्वाकर्षणामुळे खालीच जात असते, पण आपल्या डोळ्यांना ती वर चढताना दिसते. जगभरात अशा ठिकाणांना 'ग्रॅविटी हिल' असंही म्हणतात.5 / 6विज्ञानाच्या पलीकडे जाऊन लडाखमधील स्थानिक लोकांच्या या जागेबद्दल काही जुन्या समजुती आहेत. असं म्हटलं जातं की, कधीकाळी हा मार्ग थेट 'स्वर्गाकडे' जात असे. जे लोक पुण्यवान किंवा पात्र असत, त्यांनाच ही शक्ती वर खेचून घेत असे आणि जे अपात्र असत, ते कधीच पुढे जाऊ शकत नसत. आजही अनेक पर्यटक या जागेकडे आदराने आणि कुतूहलाने पाहतात.6 / 6जर तुम्हालाही या जादूई अनुभवाचा आनंद घ्यायचा असेल, तर मे ते सप्टेंबर हा काळ फिरण्यासाठी सर्वोत्तम आहे. या काळात हवामान आल्हाददायक असते आणि रस्तेही पर्यटनासाठी खुले असतात.