PM मोदींच्या आवाहनाचा परिणाम! इंधन बचतीसाठी सुवेंदू अधिकारी यांचाही पुढाकार; DGP ना दिला मोठा आदेश

आगामी काळात इतर मंत्री आणि नेतेही इंधन बचतीसाठी अशाच प्रकारचे उपाय योजण्याची शक्यता आहे....

पंतप्रधान नरेंद्र मोदी यांनी, देशातील इंधनाची बचत करण्यासाठी आणि सरकारी खर्च कमी करण्यासाठी केलेल्या आवाहनाचा प्रभाव आता दिसू लागला आहे. पंतप्रधानांनी स्वतःही आपल्या ताफ्यातील वाहनांची संख्या कमी करून एक आदर्श घालून दिला आहे, त्याच धर्तीवर आता पश्चिम बंगालचे मुख्यमंत्री सुवेंदू अधिकारी यांनीही आपल्या ताफ्यात मोठी कपात करण्याचा निर्णय घेतला आहे. यासंदर्भात त्यांनी राज्याच्या DGP नाही मोठे आदेश दिले आहे. महत्वाचे म्हणजे, आगामी काळात इतर मंत्री आणि नेतेही इंधन बचतीसाठी अशाच प्रकारचे उपाय योजण्याची शक्यता आहे.

काय म्हणाले सुवेंदू अधिकारी? -
पश्चिम बंगाल विधानसभा अधिवेशनाच्या पहिल्याच दिवशी अर्थात बुधवारी (१३ मे), सुवेंदू अधिकारी यांनी भवानीपूरचे आमदार म्हणून शपथ घेतली. यानंतर बोलतान त्यांनी पंतप्रधानांच्या निर्णयांचे स्वागत केले. अधिकारी म्हणाले, "पंतप्रधान नरेंद्र मोदी यांनी देशहित आणि जनहितार्थ ही पावले उचलली आहेत." आपल्या ताफ्यातील वाहने अर्धी करण्यासंदर्भात माहिती देताना ते म्हणाले, "मी पोलीस महासंचालकांना (DGP) स्पष्ट आदेश दिले आहेत की, माझ्या ताफ्यात फार वाहने ठेवण्याची आवश्यकता नाही. आजपासूनच मी वाहनांची संख्या कमी केली आहे." तसेच, सर्वांनी पंतप्रधानांच्या या आवाहनाचा विचार करावा, असे आवाहनही त्यांनी यावेळी केले.

ताफ्यात इलेक्ट्रिक वाहनांचा वापर वाढवण्याचे मोदींचे निर्देश -
पंतप्रधान मोदींनी सरकारी खर्च कमी करण्यासाठी केवळ वाहनांची संख्याच कमीकेली नाही, तर ताफ्यात इलेक्ट्रिक वाहनांचा (EV) अधिक वापर करण्याचे निर्देशही 'एसपीजी'ला (SPG) दिले आहेत. विशेष म्हणजे, यासाठी नवीन वाहने न खरेदी करण्याच्या सूचनाही त्यांनी दिल्या. 

पंतप्रधान मोदींनी दिलेल्या निर्देशांची अंमलबजावणी सुरू झाली असून, नुकत्याच झालेल्या गुजरात आणि आसाम दौऱ्यात पंतप्रधानांचा ताफा लहान दिसून आला. सुरक्षा मानकांशी कोणतीही तडजोड न करता 'ब्लू बुक'मधील नियमांनुसारच हा बदल करण्यात आला आहे.