लोकमत न्यूज नेटवर्क
कऱ्हाड : तालुक्याला दरवर्षी पुराचा फटका बसतो. कृष्णा, कोयना नद्यांना पूर आल्यानंतर शहरात पाणी शिरते. सध्या पावसाळा सुरू झाल्याने पूर परिस्थितीला सामोरे जाण्यासाठी प्रशासनाकडून जय्यत तयारी केली जात असून, आपत्ती व्यवस्थापन विभाग सतर्क झाला आहे. या विभागाकडून मंगळवारी कृष्णा व कोयना नदीकाठची पाहणी करण्यात आली. तसेच आपत्तीकाळात वापरण्यात येत असलेल्या बोटींची चाचणीही घेण्यात आली.
जिल्हाधिकारी शेखर सिंह यांनी दिलेल्या आदेशानुसार, मंगळवारी दुपारी नायब तहसीलदार आनंदराव देवकर, मंडलाधिकारी महेश पाटील, तलाठी संजय जंगम, अग्निशामक दलाचे माने, विनोद काटरे, महसूल विभागातील कर्मचारी यांनी कृष्ण व कोयना नदीपात्रात आपत्ती व्यवस्थापन विभागातील साहित्य व बोटींची तपासणी केली. तसेच बोटीतून नदीकाठची पाहणीही केली. जिल्हा आपत्ती व्यवस्थापन विभागाकडून कऱ्हाडला आवश्यक साहित्य देण्यात आलेली आहेत.
प्रांताधिकारी उत्तम दिघे व तहसीलदार अमरदीप वाकडे यांच्या सूचनेनुसार, तालुका आपत्ती व्यवस्थापनाच्या वतीने नदीपात्रांची पाहणी करण्यात आली. गेल्या वर्षीप्रमाणे यंदा कराड शहरात पुराचे पाणी शिरू न देण्यासाठी आपत्ती व्यवस्थापन विभाग व प्रशासनाकडून तयारी केली जात आहे. पावसाळ्यातील संभाव्य पूरस्थितीचा धोका लक्षात घेत जुलैच्या शेवटच्या आठवड्यात बचाव दलाची टीम कऱ्हाडला दाखल होणार असल्याची माहिती प्रशासनाकडून देण्यात आली आहे.
फोटो : १६केआरडी०४
कॅप्शन : कऱ्हाड येथे आपत्ती व्यवस्थापन विभागाकडून बोटींची चाचणी घेण्यात आली.