Sangli Crime: भिवर्गी येथे युवकाचा खून, मित्र ताब्यात

नशेतून घटना घडल्याची चर्चा 

उमदी : भिवर्गी (ता. जत) येथे सोमवारी सायंकाळी २५ वर्षीय युवकाचा खून झाल्याची घटना घडली. महादेव सिद्धप्पा बिराजदार (वय २५) असे खून झालेल्या युवकाचे नाव आहे. या प्रकरणी शीलसिद्ध मल्लाप्पा बिराजदार याला उमदी पोलिसांनी ताब्यात घेतले आहे.

घटनास्थळावरून मिळालेली प्राथमिक माहिती अशी की, मयत महादेव व शीलसिद्ध हे दोघे मित्र व नातेवाईक होते. दोघे एकत्र असताना काही कारणास्तव दोघांमध्ये वाद निर्माण झाला असावा. यातून झालेल्या मारामारीत महादेव खाली पडल्याने डोक्याला मार लागून त्याचा मृत्यू झाल्याचा संशय व्यक्त करण्यात येत आहे. नेमक्या कोणत्या कारणावरून वाद झाला आणि खून झाला का, याचा तपास पोलिस करीत आहेत.

घटनेची माहिती मिळताच उमदी पोलिसांनी घटनास्थळी धाव घेत पंचनामा केला. मृतदेह उत्तरीय तपासणीसाठी पाठविण्यात आला आहे. दरम्यान, रात्री उशिरापर्यंत या प्रकरणाची पोलिस ठाण्यात अधिकृत नोंद करण्यात आली नव्हती.

सलग खुनांच्या घटनांमुळे जत पूर्व भाग हादरला

उमदी पोलिस ठाण्याच्या हद्दीत अवघ्या दोन दिवसांत खुनाच्या दोन घटना घडल्याने पूर्व भाग हादरला आहे. काल संख येथे युवकाचा गोळ्या झाडून खून करण्यात आला होता, तर आज भिवर्गी येथे युवकाचा खून झाल्याची घटना समोर आली. सलग घडणाऱ्या गंभीर घटनांमुळे कायदा व सुव्यवस्थेचा प्रश्न पुन्हा ऐरणीवर आला असून, नागरिकांमध्ये भीतीचे वातावरण निर्माण झाले आहे.