‘गॅस स्टँपिंग’साठी आता जूनअखेरची डेडलाईन

नीता शिंदे : केरोसीन उचल करणाऱ्या गॅस ग्राहकांना अनिवार्य

रत्नागिरी : उच्च न्यायालयाने गॅस जोडणीची नोंद करणे अनिवार्य केले आहे. काही शिधापत्रिकांवर गॅस जोडणी शिक्का नसल्याचा गैरफायदा घेत ग्राहक केरोसीनची उचल करतात. ही शक्यता लक्षात घेत जिल्हा पुरवठा विभागाकडून सिलिंडरधारकांना ‘गॅस स्टँपिंग’ पूर्ण करून घेण्यासाठी जून अखेरची मुदत देण्यात आल्याची माहिती जिल्हा पुरवठा अधिकारी नीता शिंदे - सावंत यांनी दिली.
शासनाने सप्टेंबर २०१५पासून गॅस जोडणी असलेल्या शिधापत्रिधारकांना केरोसीन बंद केले आहे. उच्च न्यायालयाच्या नागपूर खंडपीठाने ३१ मार्च २०१६पर्यंत ‘गॅस स्टँम्पिंग मोहीम’ पूर्ण करण्याचे आदेश दिले होते. त्यानंतर राज्यामधील गॅस एजन्सींकडून गॅस जोडणीधारकांची यादी प्रत्येक जिल्ह््यातील पुरवठा कार्यालयाने मागवली होती.
राज्य शासनाने सप्टेंबर २०१५पासून गॅस जोडणी असलेल्या शिधापत्रिधारकांना केरोसीन बंद केले आहे. रत्नागिरी जिल्ह््यात एकूण ४,२३,९६८ शिधापत्रिकाधारक असून, ‘गॅस स्टँम्पिंग मोहीम’ पूर्ण झाल्यानंतरच यापैकी किती ग्राहकांकडे गॅस जोडणी आहे, हे निश्चित होणार आहे.
यासाठी जिल्ह््यातील रेशनदुकानदारांकडे गॅस एजन्सीकडून प्राप्त झालेली गॅस जोडणीधारकांची यादी देण्यात आली असून, त्यानुसार आता ‘गॅस स्टँम्पिंग’ची जबाबदारी रेशनदुकानदारांकडे देण्यात आली आहे. त्यामुळे आता शिधापत्रिकेवर गॅस सिलिंडरची नोंदणी न केलेल्या ग्राहकांचे केरोसीन थांबविणे शक्य होणार आहे. शिधापत्रिकेवर गॅस जोडणी शिक्का नसल्याचा गैरफायदा घेत केरोसीनची उचल केल्यास संबंधित ग्राहकावर कारवाई होणार असल्याने आपोआपच या प्रकारावर अंकुश येणार आहे.
ज्या ग्राहकांनी अजूनही शिधापत्रिकेवर गॅस नोंदणी केलेली नाही, त्यांनी संबंधित रेशनदुकानदाराकडे ३० जूनपर्यंत ही नोंदणी करावी, असे आवाहन जिल्हा पुरवठा अधिकारी नीता शिंदे - सावंत यांनी केले आहे. (प्रतिनिधी)


आवाहन : नोंदणी त्वरित करावी
जिल्ह््यात ग्राहकांकडे गॅसजोडणी असूनही त्यांनी रेशनकार्डवर त्याची नोंदणी करून घेतलेली नाही, असे प्रकार असू शकतात. त्यामुळे ज्यांना केरोसीनचा पुरवठा होत आहे. त्या ग्राहकांनी तत्काळ गॅसनोंदणी शिधापत्रिकेवर करून घेण्याचे आवाहन शिंदे यांनी केले.