‘गे डेटिंग’ ॲपवर मैत्री अन् मग लूट...! पुण्यातील टोळीचा धक्कादायक पर्दाफाश

Crime News - कर्वेनगर परिसरातील २५ वर्षीय युवकाची आरोपींशी ‘गे डेटिंग’ ॲपवरून ओळख झाली होती.

पुणे : गे डेटिंग ॲपद्वारे तरुणाशी मैत्री करायची आणि भेटायला बोलवून मारहाण करत लुटायचे, असे गुन्हे करणाऱ्या टोळीचा वारजे माळवाडी पोलिसांनी पर्दाफाश केला. या प्रकरणी अवघ्या काही तासांत एका अल्पवयीन आरोपीला ताब्यात घेऊन ओम गणेश वाघमारे (वय २०, रा. वारजे-माळवाडी), गणेश उत्तम माने (वय २७, रा. आकाशनगर, वारजे), जगदीश रामू पवार (वय २३, रा. शिवणे) या तिघांना अटक करण्यात आली आहे.

कर्वेनगर परिसरातील २५ वर्षीय युवकाची आरोपींशी ‘गे डेटिंग’ ॲपवरून ओळख झाली होती. २८ एप्रिलच्या रात्री एका अल्पवयीन आरोपीने युवकाला कर्वेनगर येथील डी-मार्टजवळ भेटण्यास बोलवले. तेथून दुचाकीवरून फिरायला जाण्याच्या बहाण्याने त्याला निर्जनस्थळी नेले. काही वेळातच त्याचे तीन साथीदार घटनास्थळी आले. संबंधित युवक चुकीच्या हेतूने येथे आल्याचा खोटा आरोप करत चौघांनीही त्याचावर दगडाने हल्ला करत लाथा-बुक्क्यांनी बेदम मारहाण केली.

मारहाणीनंतर आरोपींनी युवकाचा मोबाईल हिसकावून ८ हजार ६०० रुपये स्वतःच्या बँक खात्यात वर्ग करून घेतले. गळ्यातील चांदीची चेन काढून घेतली. घटनेची माहिती मिळताच पोलिसांनी तातडीने तांत्रिक तपास व खबऱ्याद्वारे अतुलनगर चौक परिसरातून मुख्य आरोपी ओम वाघमारे याला ताब्यात घेतले. चौकशीनंतर अन्य आरोपींची माहिती समोर आली. त्यानंतर सर्वांना अटक झाली. तपास पोलिस उपनिरीक्षक शंकर पाटील करत आहेत.