बुधवार पेठेत कुंटणखान्यांवर पोलिसांची कारवाई; ४ फ्लॅट सील, ३ बांगलादेशी महिलांना अटक

चौकशीत या महिला मागील एक महिन्यापासून भारतात बेकायदेशीररित्या वास्तव्यास असून बुधवार पेठेत वेश्याव्यवसाय करत असल्याची माहिती समोर आली

पुणे : शहरातील बुधवार पेठ भागातील कुंटणखान्यांवर फरासखाना पोलिसांनी मोठी कारवाई करत चार फ्लॅट एक वर्षासाठी सील केले असून, अनधिकृतपणे भारतात वास्तव्य करणाऱ्या तीन बांगलादेशीमहिलांना ताब्यात घेतले आहे.

फरासखाना पोलीस स्टेशन येथे गुन्हा क्रमांक 96/2024 अन्वये भारतीय न्याय संहिता तसेच अनैतिक मानवी वाहतूक प्रतिबंधक कायद्यांतर्गत गुन्हा दाखल करण्यात आला आहे. या प्रकरणाचा तपास वरिष्ठ पोलीस निरीक्षक प्रशांत भस्मे यांच्या मार्गदर्शनाखाली सुरू होता. तपासादरम्यान बुधवार पेठेतील ‘बेगम बिल्डिंग’, ‘न्यू वेलकम बिल्डिंग’ तसेच दाणे आळी परिसरातील काही ठिकाणी कुंटणखाने चालवले जात असल्याचे निष्पन्न झाले. यावरून पोलिसांनी संबंधित चार फ्लॅट सील करण्याचा प्रस्ताव पोलीस आयुक्त अमितेश कुमार यांच्याकडे पाठविला होता. त्यानुसार अधिकारांचा वापर करून संबंधित चार फ्लॅट एक वर्षासाठी सीलबंद करण्यात आले.

दरम्यान, पोलीस उपायुक्त (परिमंडळ-१) कृषिकेश रावले यांच्या सूचनेनुसार रेड लाईट एरियामध्ये बांगलादेशी नागरिकांचा शोध घेण्याची मोहीम राबविण्यात आली. गुप्त माहितीच्या आधारे पोलिसांनी बुधवार पेठ परिसरात सापळा रचून कारवाई केली. यावेळी जोशना शकुर अली, कुलसुम खातून आणि अंजुरा बेगम (सर्व रा. बांगलादेश) या तीन महिलांना ताब्यात घेण्यात आले. चौकशीत या महिला मागील एक महिन्यापासून भारतात बेकायदेशीररित्या वास्तव्यास असून बुधवार पेठेत वेश्याव्यवसाय करत असल्याची माहिती समोर आली. त्यांच्याकडून बांगलादेशी असल्याचे पुरावे मिळाल्यानंतर पुढील कायदेशीर कारवाई करण्यात येत आहे.