पाटणला ४१ जणांना अतिसाराची लागण

पाटण (ता. आंबेगाव) येथील ४१ आदिवासी ग्रामस्थांना अतिसाराची लागण झाली आहे. एकाच वेळी गावात एवढ्या मोठ्या प्रमाणात जुलाब व उलट्यांची लागण झाल्याने एकच खळबळ उडाली आहे

डिंंभे : पाटण (ता. आंबेगाव) येथील ४१ आदिवासी ग्रामस्थांना अतिसाराची लागण झाली आहे. एकाच वेळी गावात एवढ्या मोठ्या प्रमाणात जुलाब व उलट्यांची लागण झाल्याने एकच खळबळ उडाली आहे. घडलेल्या घटनेने प्रशासनही खडबडून जागे झाले असून आरोग्य विभागाची तीन पथके परिस्थिती नियंत्रणाखाली आणण्यासाठी काम करत आहेत. आंबेगावचे तहसीलदार बी. जे. गोरे नियंत्रण ठेवून असून परिस्थिती आटोक्यात येत असल्याचे त्यांनी सांगितले. आंबेगाव तालुक्यात आदिवासी भागातील पाटण गावात मंगळवारी (दि. २७) अतिसाराचे तीन रुग्ण तळेघर येथील प्राथमिक आरोग्य केंद्रात दाखल झाले. गावातील अधिक लोकांनाही जुलाब, उलट्या होत असल्याची माहिती वैद्यकीय अधिकारी शारदा मोरमारे यांनी दिली. परिस्थितीचे गांभीर्य लक्षात घेऊन तळेघर येथील आरोग्य केंद्रातील गोळ्या, औषधांचा साठा घेऊन तातडीने पाटण येथे गेले, त्या ठिकाणी रुग्णांचे वाढते प्रमाण पाहता वरिष्ठांशी संपर्क साधून तातडीच्या सेवेची मागणी करण्यात आली. आरोग्य विभागाच्या पथकाने येऊन रात्री २७ रुग्णांना येथील माजी सरपंच महादेव मावळे यांच्या घरातच दाखल करून सलाईन, आवश्यक इंजेक्शन व सर्व तातडीची औषधे, गोळ्या पुरवून प्रथम घरोघरी पाण्याची तपासणी केली. पाणीसाठा शुद्धीकरणासाठी टीसीएल टाकून ग्रामस्थांना मार्गदर्शन केले. मंगळवारी रात्री आठ वाजता अतिरिक्त जिल्हा आरोग्य अधिकारी डॉ. गिरीगोसावी, तहसीलदार बी. जे. गोरे, तालुका आरोग्य अधिकारी डॉ. व्ही. बी. काळे यांच्यासह डिंंभे, तळेघर, महाळुंगे पडवळ येथील प्राथमिक आरोग्य केंद्रांचे डॉक्टर व कर्मचारी घटनास्थळी हजर होऊन उपचार सुरू करण्यात आले. रात्री २७ रुग्णांवर उपचार सुरू होते, तर आज दिवसभरात १४ रुग्णांमध्ये वाढ झाली. आज दुपारपर्यंत ४१ रुग्णांच्या प्रकृतीत सुधारणा होत असल्याचे आरोग्य विभागाकढून सांगण्यात आले आहे. अतिसार या आजारात ताप, जुलाब व रक्ताचा अंश असलेल्या उलट्या होत असल्याने येथील ग्रामस्थ भयभीत झाले होते. आज पंचायत समितीचे सभापती कैलासबुवा काळे, सदस्य सुभाष तळपे यांनी भेट दिली तसेच शिवसेनेचे जयसिंंग एरंडे, अमोल अंकुश, खंडू कोकणे, नितीन केंगले यांनी रुग्णांना फळेवाटप करून परिस्थितीचा आढावा घेतला. (वार्ताहर)