पुणे: पुणे महानगर प्रदेश विकास प्राधिकरणाच्या (पीएमआरडीए) हिंजवडी-शिवाजीनगर मेट्रो प्रकल्पाचा पहिला टप्पा पुढील महिन्यात सुरू होण्याची शक्यता आहे. ही मेट्रो सुरू झाल्यानंतर प्रवाशांना पुणेरी मेट्रो आणि महाराष्ट्र मेट्रो रेल कॉर्पोरेशनच्या (महामेट्रो) मेट्रोमधून एकाच तिकिटावर प्रवास करता येणार आहे. त्यासाठीची एकत्र तिकीट प्रणालीचे काम शेवटच्या टप्प्यात आहे. हिंजवडी-शिवाजीनगर मेट्रो सुरू होऊपर्यंत या तिकीट प्रणालीचे काम पूर्ण होणार आहे. त्यामुळे प्रवाशांना मोठा दिलासा मिळणार आहे.
महामेट्रोकडून सध्या वनाज ते रामवाडी आणि पिंपरी ते स्वारगेट या मार्गांवर मेट्रो सेवा सुरू आहे. आता पीएमआरडीएच्या हिंजवडी-शिवाजीनगर मेट्रोचे काम अंतिम टप्प्यात आले असून, मे महिन्यात पहिल्या टप्प्यात १२ किलोमीटर मार्गावर मेट्रो सुरू करण्याचे नियोजन करण्यात आले आहे. मुख्यमंत्री देवेंद्र फडणवीस यांनी या कामाला गती देण्याच्या सूचना दिल्या असून, उर्वरित मार्ग जुलैपर्यंत पूर्ण करण्याचे उद्दिष्ट ठेवण्यात आले आहे. हिंजवडी मेट्रो शिवाजीनगरपर्यंत आल्यानंतर ती जिल्हा न्यायालय मेट्रो स्थानकाशी जोडली जाणार आहे. यासाठी पादचारी पुलाचे काम वेगात सुरू असून, दोन्ही मेट्रो मार्गांमध्ये सुलभ बदल (इंटरचेंज) करता येणार आहे.
दरम्यान, महामेट्रो आणि पीएमआरडीए मेट्रो या दोन्ही सेवांसाठी एकच तिकीट प्रणाली लागू करण्याचे काम अंतिम टप्प्यात आहे. आतापर्यंत दोन्ही संस्थांच्या अधिकाऱ्यांमध्ये चार ते पाच बैठका पार पडल्या असून, मेट्रो सुरू होईपर्यंत ही प्रणाली कार्यान्वित होणार आहे. यामुळे प्रवाशांना एकाच कार्ड किंवा तिकिटावर संपूर्ण प्रवास करता येणार आहे.
पीएमपी सेवाही होणार सोयीचे
मेट्रो आणि बसचे प्रवास सोयीचे व्हावे यासाठी पुणे महानगर परिवहन महामंडळाच्या (पीएमपी) बस सेवेलाही या प्रणालीशी जोडण्याचे प्रयत्न सुरू आहे. त्यासाठी महामेट्रो आणि पीएमपी अधिकाऱ्यांमध्ये नुकतीच बैठक झाली. या बैठकीत मेट्रोसाठी फिडर सेवा वाढविण्यावरही भर देण्यात आला. ‘वन पुणे कार्ड’च्या माध्यमातून मेट्रो आणि बस या दोन्ही सार्वजनिक वाहतूक सेवांचा एकत्रित वापर सुलभ करण्याचा प्रयत्न सुरू असून, यामुळे प्रवाशांचा वेळ वाचणार आहे, तसेच प्रवास अधिक सोयीस्कर होणार आहे.
महामेट्रो आणि हिंजवडी-शिवाजीनगर मेट्रोमधून प्रवाशांना एकाच तिकिटावर प्रवास करता यावा यासाठी तिकीट प्रणाली जोडण्याचे काम अंतिम टप्प्यात आहे. मेट्रो सुरू होईपर्यंत हे काम पूर्ण होईल. तसेच, जिल्हा न्यायालय स्थानकापासून लाईन थ्रीला जोडणाऱ्या मार्गिकेचे कामही सुरू आहे. - श्रावण हर्डीकर, व्यवस्थापकीय संचालक, महामेट्रो
Web Summary : Pune Metro's Hinjawadi-Shivajinagar line is set to open. Integrated ticketing allows travel on both Pune and MahaMetro lines with one card, saving time. Integration with PMP buses is also planned for seamless travel.
Web Summary : पुणे मेट्रो की हिंजवडी-शिवाजीनगर लाइन खुलने वाली है। एकीकृत टिकटिंग से पुणे और महामेट्रो दोनों लाइनों पर एक कार्ड से यात्रा की जा सकेगी, जिससे समय की बचत होगी। निर्बाध यात्रा के लिए पीएमपी बसों के साथ एकीकरण की भी योजना है।