सराफवाडी येथे माय लेकाची गळफास घेवून आत्महत्या; कारण अस्पष्ट, वालचंदनगर पोलिसांकडून तपास सुरू 

सराफवाडी येथील सुमन तुकाराम जाधव व अतुल तुकाराम जाधव या मायलेकरांनी शेतातील झाडाला गळफास घेऊन आत्महत्या केली आहे.

शेळगाव : सराफवाडी (ता.इंदापूर) येथील सुमन तुकाराम जाधव (वय ६३ वर्ष) व अतुल तुकाराम जाधव (वय ३५ वर्षे) या मायलेकरांनी सोमवार (दि २०) रोजी शेतातील झाडाला गळफास घेऊन आत्महत्या केली आहे. आत्महत्येचे कारण समजले नसून घटनेची माहिती मिळताच वालचंदनगर पोलीस स्टेशनचे अधिकारी व कर्मचारी यांनी घटनास्थळी भेट देऊन पंचनामा केला.

या घटनेबाबत तुकाराम दामू जाधव (वय ७७,व्यवसाय शेती) यांनी वालचंदनगर पोलीस स्टेशनला फिर्याद दाखल केले आहे. वालचंदनगर पोलिसांनी दिलेल्या माहिती नुसार तुकाराम जाधव यांची पत्नी सुमन जाधव व मुलगा अतुल जाधव यांनी कोणत्यातरी अज्ञात कारणासाठी दिनांक २०एप्रिल २०२६ रोजी सकाळी सहा वाजण्या पुर्वी शेत जमीन गट नंबर ५७/३ मधील शेततळ्याजवळील लिंबाच्या व आंब्याच्या झाडाला गळफास घेतला.

त्यांना पुढील कार्यवाहीसाठी लासुर्णे येथील प्राथमिक आरोग्य केंद्रात खासगी वाहनाने आणले होते. माय लेकाच्या आत्महत्याचे कारण अद्याप अस्पष्ट आहे. माय लेकाच्या आत्महत्याने सराफवाडी परिसरात हळहळ व्यक्त होत आहे. पुढील तपास सहाय्यक पोलीस निरीक्षक राजकुमार डुणगे यांच्या मार्गदर्शनाखाली पोलीस हवालदार कीर्तीलाल गायकवाड करत आहेत.