चुलत भावाकडून अल्पवयीन बहिणीवर अत्याचार; पाप लपवण्यासाठी बालविवाह, चाकणमधील संतापजनक घटना

विवाहानंतर तिच्यावर जबरदस्ती करून मारहाण केली, अखेर त्रासाला कंटाळून मुलीने पोलीस ठाण्यात धाव घेतली

चाकण: खेड तालुक्यातील चाकण परिसरातून माणुसकीला काळिमा लावणारी आणि नातेसंबंधांना काळोखी छाया देणारी धक्कादायक घटना उघडकीस आली आहे. बहिणीच्या रक्षणाची जबाबदारी असलेल्या चुलतभावानेच तिच्यावर वारंवार अत्याचार केल्याची संतापजनक बाब समोर आली आहे. हे कृत्य लपवण्यासाठी संबंधित अल्पवयीन मुलीचा जबरदस्तीने बालविवाह लावण्यात आल्याचेही उघड झाले आहे. या प्रकरणी उत्तर चाकण पोलिसांनी मुख्य आरोपीसह सात जणांविरुद्ध गुन्हा दाखल केला आहे.

किशोर गंगाधर वाईकर (रा. कांची इन्क्लेव्ह, चाकण), अविनाश बाळासाहेब गोडे (रा. भेंडा, नेवासा, जि. अहिल्यानगर), गंगाधर चिमाजी वाईकर (रा. चाकण), आण्णा मोरकर (रा. भेंडा, नेवासा) यांसह अन्य तीन महिलांवर गुन्हा दाखल करण्यात आला आहे. पीडित अल्पवयीन मुलगी नोव्हेंबर २०२५ मध्ये आरोपी किशोर वाईकर याच्या घरी त्याच्या गरोदर पत्नीची देखभाल करण्यासाठी आली होती. मात्र, या काळातच किशोरने तिचा विश्वासघात करत फोटो व्हायरल करण्याची व जीवे मारण्याची धमकी देत तिच्यावर वारंवार अत्याचार केले. या अत्याचारातून पीडिता गरोदर राहिल्यानंतर प्रकरण उघड होण्याच्या भीतीने आरोपीने डॉक्टरांना खोटी माहिती देत गर्भपाताच्या गोळ्या देऊन गर्भपात घडवून आणल्याचा आरोप आहे. घटना लपवण्यासाठी आरोपीने आपल्या मेहुण्यासोबत म्हणजेच अविनाश गोडे याच्याशी पीडितेचा बेकायदेशीर बालविवाह लावला. २७ जानेवारी २०२६ रोजी चाकणमधील एका रेस्टॉरंटमध्ये हा विवाह पार पडल्याचे समोर आले आहे. विवाहानंतरही पीडितेचे हाल थांबले नाहीत. पत्नी अल्पवयीन असल्याचे माहिती असूनही पतीने तिच्यावर जबरदस्ती केल्याचा आरोप आहे. विरोध केल्यास तिला मारहाण करण्यात येत होती. अखेर या त्रासाला कंटाळून पीडितेने धाडस दाखवत पोलीस ठाण्यात धाव घेतली. उत्तर चाकण पोलिसांनी या प्रकरणी पोक्सो आणि बालविवाह प्रतिबंधक कायद्यानुसार गुन्हा नोंदवला आहे. वरिष्ठ पोलिस निरीक्षक जितेंद्र कदम यांच्या मार्गदर्शनाखाली पोलिस उपनिरीक्षक संगीता कदम या प्रकरणाचा पुढील तपास करत आहेत.