‘त्या मेसेजने निवडणूक वेगळ्या वळणावर गेली’ अजितदादांच्या रणनीतीचे ‘सिक्रेट’ उलगडले

-  त्या एस एम एसने निवडणूक वेगळ्या वळणावर गेली,अशी त्यांचे स्वीय सहायक सुनीलकुमार मुसळे यांनी याबाबत सोशल मिडीयावर केलेली पोस्ट चर्चेेत आली आहे.  

बारामती - माळेगाव सहकारी साखर कारखाना निवडणुक उपमुख्यमंत्री अजित पवार यांनी २० जागांवर एकहाती वर्चस्व मिळवत  जिंकली. यामध्ये विरोधकांना केवळ एका जागेवर समाधान मानावं लागले.मात्र,यंदा पवार उपमुख्यमंत्री पवार यांनी स्वत: उमेदवार जाहिर करुन थांबले नाहित.तर स्वत:चेच नाव कारखान्याचे अध्यक्षपदासाठी घोषित केले.त्यामुळे बारामतीकरांच्या भुवया उंचावल्या होत्या.तसेच पवार यांच्या रणनीतीचा ‘सस्पेन्स’ कायम होता.आता मात्र, पवार यांचे यांचे ‘सिक्रेट’ समोर आले आहे. त्या एस एम एसने निवडणूक वेगळ्या वळणावर गेली,अशी त्यांचे स्वीय सहायक सुनीलकुमार मुसळे यांनी याबाबत सोशल मिडीयावर केलेली पोस्ट चर्चेेत आली आहे.

बारामतीच्या राजकारणात पवार यांनी विधानसभा निवडणुकीशिवाय इतर निवडणुकीत  स्वत:ची उमेदवारी जाहिर करण्याची पहिलीच वेळ  आहे.त्यामुळे पवार यांच्या रणनीतीचा ‘सस्पेन्स’ कायम होता.आता याबाबत माहिती पुढे आले आहे.मुसळे म्हणतात, कारखाना निवडणूकीत उपमुख्यमंत्री अजितदादा पवार यांच्या सूक्ष्म नियोजन आणि नेटके व्यवस्थापन या निवडणुकीत दिसून आले. निवडणुकीत अनेकदा जनता काय म्हणते तो आवाज ऐकण्याची गरज असते. निवडणुकीच्या सुरुवातीला एका सामान्य कार्यकर्त्यांने दादांना 'दादा चेअरमनपदाचा उमेदवार जाहीर करू नका. नाहीतर तुम्हीच चेअरमन व्हा.'एका एक मनस्वी मेसेज पाठवला होता. त्यात दादांच्याबद्दलचे भाबडे आणि खरे प्रेम होते. त्या एस एम एसने निवडणूक वेगळ्या वळणावर गेली. निवडणूक चर्चेत आली कारण दादांनी स्वतःला चेअरमनपदाचे उमेदवार म्हणून जाहीर केले.  दादा स्वतः चेअरमन होणार यामुळे कार्यकर्ते ताकदीने लढले.दादांची घोषणा ही एक अस्मिता बनली. 

साखर कारखाना क्षेत्रातला त्यांचा अनुभव हा माळेगाव कारखान्याला अजून उर्जित अवस्था आणेल असा विश्वास यामुळे निर्माण झाला.सभासदांना दादांचे नेतृत्व आश्वासक वाटले, कार्यकर्त्यांच्यात उत्साह निर्माण झाला.कारखान्याच्या प्रगतीच्या दृष्टीने अनेक सकारात्मक गोष्टी त्यांनी मांडल्या, त्या सभासद शेतकऱ्यांना भावल्या. स्वतः उपमुख्यमंत्री अजितदादा कारखान्याचे चेअरमन होणार ही गोष्ट लोकांना भावली. मुळात ही घोषणा लोकांना अनपेक्षित होती, त्यामुळे दादांच्या नेतृत्वावर विश्वास ठेवत सभासदांनी अभूतपूर्व यश दिले. निर्णायक कौल दिल्याचे मुसळे यांनी पोस्ट मध्ये नमुद केले आहे.