CoronaVirus: पुण्यात खासगी रुग्णालयातील ऑक्सिजन संपल्याने चौघांचा बळी

चाकणमधील रुग्णालयात तिघांचा मृत्यू : शेवाळवाडीतही एकाने प्राण सोडले

लोकमत न्यूज नेटवर्क
पुणे : ऑक्सिजन संपल्याने रुग्णालयात उपचार घेत असलेल्या चौघांचा मृत्यू झाल्याचा धक्कादायक प्रकार उघडकीस आला आहे. चाकणमधील खासगी रुग्णालयात तीन जणांचा, तर पुण्यातील शेवाळवाडीतील एकाचा मृत्यू झाला.
चाकणमधील एका खासगी रुग्णालयात मंगळवारी पहाटे ऑक्सिजन संपल्याने २० गंभीर रुग्णांना तातडीने अन्यत्र हलवण्यात आले. मात्र, ३ रुग्णांना प्राण गमवावे लागले. मृत्युमुखी पडलेल्यांत २५ वर्षीय युवकासह ४५ वर्षीय पुरुष आणि ६५ वर्षीय महिलेचा समावेश आहे.
ऑक्सिजन पुरवठा बंद झाल्याने मध्यरात्री रुग्णालय प्रशासनाने संबंधित २० रुग्णांच्या नातेवाइकांना ऑक्सिजन आणि व्हेन्टीलेटरवर असलेल्या रुग्णांना हलवण्याच्या सूचना केल्या. काही रुग्णांना नातेवाइकांनी हलवले. मात्र अन्य रुग्णांच्या नातेवाइकांना कुठेही व्हेंटिलेटर बेड मिळाला नाही. त्यामुळे नातेवाईक देखील हतबल झाले. अखेर यातील तीन रुग्णांनी ऑक्सिजनअभावी प्राण सोडले.
आणखी काही मृत्यू झाले आहेत का, याबाबतची पडताळणी सुरू असल्याचे चाकण ग्रामीण रुग्णालयाच्या वैद्यकीय अधीक्षक डॉ. नंदा ढवळे यांनी सांगितले. मृत्यू झालेल्यांपैकी ३ मृतदेहांवर चाकण चक्रेश्वर मंदिर परिसरातील गॅसदाहिनीत मंगळवारी सकाळी अंत्यसंस्कार करण्यात आले आहे.

हडपसरमध्येही एक रुग्ण दगावला
हडपसरजवळील शेवाळेवाडी येथील हॉस्पिटलमध्ये उपचार सुरू असतानाच ऑक्सिजन संपल्याने एकाचा मृत्यू झाला. रुग्णालयात ५३ बेड असून, ४० रुग्णांवर उपचार सुरू आहेत. येथील ऑक्सिजनही संपत आला होता. आरोग्यमंत्र्यांसह जिल्हाधिकाऱ्यांशी संपर्क साधल्यानंतर सात सिलिंडर मिळाले. डॉ. अभिजित दरक म्हणाले, हॉस्पिटलमध्ये २३ ऑक्सिजन बेड आहेत, १२ व्हेंटिलेटर बेड असून, कोरोनाबाधितांवर उपचार सुरू आहेत. हॉस्पिटलमध्ये कोरोनाबाधितांना एका तासाला सात ऑक्सिजन सिलिंडर गरज आहे. आता फक्त एक-दीड तास पुरेल एवढाच ऑक्सिजन शिल्लक आहे.