निमगाव केतकी जवळ भरधाव टेम्पोची दुचाकीला धडक; २० वर्षीय तरुणाचा जागीच मृत्यू, एक जण गंभीर जखमी

टेम्पो चालकाने वाहतुकीचे नियम धाब्यावर बसवून बेदरकारपणे व भरधाव वेगात वाहन चालवून मोटारसायकलला धडक दिली

निमगाव केतकी: निमगाव केतकी (ता. इंदापूर) हद्दीत व्याहाळी रस्त्यावर भरधाव टेम्पोने मोटारसायकलला जोरदार धडक दिल्याने एका तरुणाचा मृत्यू झाला असून एक जण गंभीर जखमी झाला आहे. यामध्ये गणेश सतीश बिबे (वय २०, रा.गौतंडी) असे मृत्यू झालेल्या तरुणाचे नाव असून याप्रकरणी चारचाकी वाहनचालकाच्या विरोधात इंदापूर पोलिस ठाण्यात गुन्हा दाखल करण्यात आला आहे.

याबाबत शिवाजी शंकर इवरे (वय ३८, रा. गोतंडी, ता. इंदापूर) यांनी दिलेल्या फिर्यादीनुसार त्यांचे चुलत मेव्हणे गणेश सतीश बिबे (वय २०, रा. गोतंडी) व त्याचा मित्र ज्ञानदेव अशोक भोंग (वय २८, रा. निमगाव केतकी) हे दोघे १५ एप्रिल रोजी सकाळी दुचाकीवरून व्यहळीकडे जात असताना टेम्पो चालकाने वाहतुकीचे नियम धाब्यावर बसवून बेदरकारपणे व भरधाव वेगात वाहन चालवून मोटारसायकलला धडक दिली. यामध्ये गणेश बिबे याचा जागीच मृत्यू झाला तर ज्ञानदेव भोंग हा गंभीर जखमी झाला.या प्रकरणी चालक निलेश नंदकुमार तांदळकर (रा. निमगाव केतकी, ता. इंदापूर) याच्याविरोधात गुन्हा दाखल करण्यात आला आहे.पुढील तपास पोलीस हवालदार गोरवे करीत आहेत.