पुणे : पुणे शहरातील गुन्हेगारांवर वचक ठेवण्यासाठी शहर पोलिसांनी गेल्या काही महिन्यात चौथ्यांदा कोम्बिंग ऑपरेशन करून गुन्हेगारांची झाडाझडती घेतली. त्यात विविध कारणावरून तब्बल ६२ गुन्हेगारांना अटक करण्यात आली. या गुन्हेगारांकडून २ पिस्तुले, १४ कोयते, २ तलवारी जप्त केल्या आहेत. तसेच एका आरोपीकडून २ किलो ७६६ ग्रॅम गांजा जप्त केला आहे.
गुन्हे शाखेने बुधवारी सायंकाळी ५ ते रात्री १० वाजण्याच्या दरम्यान कोम्बिंग ऑपरेशनची कारवाई केली. या दरम्यान, एकूण १३८ गुन्हेगार तपासण्यात आले. त्यापैकी ८० गुन्हेगार मिळाले. प्रतिबंधक कारवाईच्या एकूण ३३ केसेस करून ३३ गुन्हेगारांना अटक करून त्यांचेकडून एकूण १ लाख ८३ हजार ४८५ रुपयांचा मुद्देमाल जप्त करण्यात आला.
ही कारवाई पोलीस आयुक्त अमिताभ गुप्ता, अपर पोलीस आयुक्त अशोक मोराळे, पोलीस उपायुक्त श्रीनिवास घाडगे यांच्या मार्गदर्शनाखाली गुन्हे शाखेच्या पथकांनी केली.
पिस्तूल बाळगल्याप्रकरणी पोलिसांनी दोघांना अटक केली असून त्यांच्याकडून २ पिस्तुले व २ जिवंत काडतुसे जप्त करण्यात आली आहे. तर १४ कोयते, २ तलवारी बाळगणाऱ्या १६ जणांना अटक केली आहे. तडीपारीचा आदेश भंग करून शहरात वावरणार्या ५ तडीपारांना पोलिसांनी अटक केली आहे.
दरम्यान, राबविलेल्या कोम्बिंग ऑपरेशमध्ये अमली पदार्थ बाळगल्याप्रकरणी पोलिसांनी २ किलो ७६६ ग्रॅम गांजा जप्त केला असून यावेळी एकाला अटक करण्यात आली आहे. तर तंबाखुजन्य पदार्थ विक्री करणाऱ्या दोघांना ताब्यात घेण्यात आले असून २६ हजार ६६५ चा माल जप्त करण्यात आला आहे. तर अवैधरित्या दारू विक्री करताना सापडल्याने दोघांना अटक करण्यात आली.
चतु:श्रृंगी, कोथरूड, वानवडी, हडपसर पोलीस ठाण्याच्या गंभीर गुन्ह्यातील पाहिजे असलेल्या एकूण ५ जणांना ताब्यात घेऊन त्यांना संबंधीत पोलीस ठाण्याच्या हवाली करण्यात आले आहे.
शहरात यापुढेही कोम्बिंग ऑपरेशन राबविण्यात येऊन गुन्हेगारांचे हालचालींवर सक्त नजर ठेवून त्यांच्यावर प्रतिबंधक कारवाई करण्यात येणार आहे, असे पोलीस आयुक्त अमिताभ गुप्ता यांनी सांगितले.