आमच्या जगण्याचा आधार हिरावला...? चिमुरड्याचा मृतदेह पाहताच आईने फोडला हंबरडा

‘आमच्या जगण्याचा आधार हिरावला, आता आम्ही कोणासाठी जगू,’ असे म्हणत तिने हंबरडा फोडला. त्यामुळे पोलिसांसह कामगार चाळ गलबलून गेली.

पिंपरी : पोलिसांनी कुलूप तोडून खोलीतील सुटकेस उघडली. त्यात तीनवर्षीय चिमुरड्याचा मृतदेह आढळला. दुपारपासून चिमुरड्याच्या शोधात असलेल्या आईची तगमग वाढली होती. आपल्या निरागस चिमुरड्याचा मृतदेह पाहताच तिच्या संयमाचा अंत झाला. ‘आमच्या जगण्याचा आधार हिरावला, आता आम्ही कोणासाठी जगू,’ असे म्हणत तिने हंबरडा फोडला. त्यामुळे पोलिसांसह कामगार चाळ गलबलून गेली.

मध्यप्रदेशातील रेवा जिल्ह्यातील असलेल्या तीनवर्षीय चिमुरड्याचे कुटुंब काही वर्षांपूर्वी रोजगारानिमित्त सुरत येथे गेले होते. तेथे चिमुरड्याच्या वडिलांचे निधन झाले. त्यानंतर चिमुरड्यासह त्याच्या सहावर्षीय बहिणीला घेऊन त्याची आई खालुंब्रे येथे सहा महिन्यांपूर्वी राहण्यास आली. रोजंदारीवर काम करून दोन मुलांसह ती उदरनिर्वाह करीत होती. दरम्यान, त्यांच्या शेजारील चाळीमध्ये बिहार येथील एक १६ वर्षीय मुलगा राहण्यासाठी आला होता. तो देखील रोजंदारीवर काम करत होता.

पतीच्या निधनानंतर एकटी पडलेली असतानाही तिने हिम्मत सोडली नव्हती. सहावर्षीय मुलगी आणि तीनवर्षीय चिमुरड्याचे पालनपोषण करण्यासाठी तिची धडपड सुरू झाली. त्यासाठी ती गुजरातमूधन चाकण एमआयडीसीत आली. कामगार दिनानिमित्त सुट्टीचा दिवस म्हणून घरातील कपडे, भांडी धुऊन इतर कामे करण्याची तिची लगबग सुरू होती. त्याच वेळी खेळण्यासाठी बाहेर गेलेला चिमुरडा बराच वेळ होऊनही परतला नाही, म्हणून तिने शोध सुरू केला. तिची तगमग वाढत होती. रात्री साडेनऊच्या सुमारास चिमुरड्याला मृतावस्थेत पाहून तिच्या भावना अनावर झाल्या.

नशा करून गुन्हेगारी कृत्य?

संशयित अल्पवयीन मुलगा १५ दिवसांपासून एका कंपनीत रोजंदारीवर कामाला जात होता. तो मोबाइल फोन वापरत नसल्याचे समोर आले आहे. कामानिमित्त १२ ते १३ तास बाहेर असल्याने त्याच्याशी जास्त कोणी संपर्कातही नव्हते. मात्र, तो नशा करत असल्याचे काही जणांनी पोलिसांना सांगितले. त्याची वैद्यकीय चाचणी केली आहे. त्याने नशेत हे कृत्य केले आहे का, याबाबतही दक्षिण महाळुंगे एमआयडीसी पोलिसांकडून तपास सुरू आहे.